ट्राफिक नियम मिचेर भिडियो खिच्ने सांसद हर्क साम्पाङमाथि कारबाही हुने

काठमाडौँ — एक हातले मोटरसाइकल चलाउँदै मोबाइलबाट भिडियो (सेल्फी) खिचेर दुर्घटनामा परेका सांसद हर्क साम्पाङमाथि ट्राफिक कारबाही हुने भएको छ। कोशी प्रदेशका प्रहरी उपरीक्षक (SP) दीपक गिरीले नियम सबैका लागि बराबर हुने भन्दै उनीमाथि कानुनी कारबाही प्रक्रिया अगाडि बढाइएको पुष्टि गरेका छन्।

उदयपुरको कटारीबाट बेलकातर्फ जाने क्रममा सांसद साम्पाङले हेल्मेटको फित्ता नलगाई एक हातले बाइक र अर्को हातले मोबाइल समातेर भिडियो खिचिरहेका थिए। सोही समयमा बाइक अनियन्त्रित भई दुर्घटना हुँदा उनको हातमा सामान्य चोट लागेको छ भने कपडा च्यातिएको छ। हाल उनको स्वास्थ्य अवस्था सामान्य रहेको छ।

कानुन निर्माताले नै ट्राफिक नियमको धज्जी उडाएको भन्दै सामाजिक सञ्जालमा नागरिकहरूले नेपाल प्रहरीलाई ट्याग गरेर कारबाहीको तीव्र माग गरेका थिए। चौतर्फी आलोचनापछि प्रहरीले उनको चालक अनुमति पत्र (लाइसेन्स) र सवारीको ब्लुबुक माग गरी जरिवाना गर्ने तयारी गरेको छ। यता साम्पाङले भने आफू आफैँ लडेकाले देशलाई कुनै नोक्सान नपुर्‍याएको भन्दै आफ्नो बचाउ गरेका छन्।