बिहारको मुजफ्फरपुरमा अस्पतालको आईसीयूमा आगलागी, ४ जनाको मृत्यु

बिहारको सबैभन्दा ठूलो प्रसाद अस्पतालको आईसीयू वार्डमा आगलागी भएको छ। बिहीबार बिहान भएको आगलागीमा धेरै बिरामीहरूको मृत्यु भएको आशंका गरिएको भारतीय सञ्चार माध्यमहरूले जनाएका छन् । अस्पतालमा ४ बिरामीहरूको शव फेला परेको समाचारमा उल्लेख छ । 

१५ जनालाई अस्पतालबाट बाहिर निकालिएको छ। सबैलाई शहरका विभिन्न अस्पतालहरूमा लगिएको छ। तीमध्ये धेरैजसोको मृत्यु भएको आशंका गरिएको छ।

अस्पतालको पाँचौं तल्लामा रहेको आईसीयूमा सर्ट सर्किटका कारण आगलागी भएको हो । बिरामीका आफन्तका अनुसार, आगलागी भएपछि अस्पतालका कर्मचारी र डाक्टरहरू भागेका थिए ।

लगभग एक घण्टापछि आगो नियन्त्रणमा ल्याइएको थियो।

त्यहाँ १३ शय्याहरू थिए, जसमा १५ बिरामीहरू थिए। आइसीयू वार्ड इन्चार्ज पनि आगलागीमा जलेर नजिकैको अस्पतालमा भर्ना गरिएको छ।