चीनको दक्षिणी युनान प्रान्तमा दुर्घटना, ११ रेल्वे कर्मचारीको मृत्यु

चीनको दक्षिणपश्चिम युनान प्रान्तमा एउटा रेलले रेलमार्ग मर्मत गर्ने कामदारहरूलाई ठक्कर दिँदा ११ जनाको मृत्यु भएको छ भने अन्य दुई जना घाइते भएका छन् ।

चीनको राज्य सञ्चालित सञ्चारमाध्यमले जनाएका अलजजिराले लेखेको छ । 

सिन्ह्वा समाचार एजेन्सीका अनुसार बिहीबार बिहानै युनान प्रान्तको राजधानी कुनमिङस्थित लुओयाङझेन स्टेसनमा घुमाउरो रेलमार्गको खण्डमा भूकम्पीय उपकरणको परीक्षणका लागि प्रयोग भइरहेको रेलले कामदारहरूलाई ठक्कर दिएको थियो । 

दुर्घटनापछि रेलवे अधिकारीहरूले तुरुन्तै आपत्कालीन कार्ययोजना सक्रिय पारे र स्थानीय सरकारसँग मिलेर उद्धार कार्य र घाइतेहरूको उपचारको व्यवस्था गरेका सिन्ह्वाले जनाएको छ ।

विश्वको सबैभन्दा ठुलो रेल सञ्जालमध्ये एक चीनमा हालैका वर्षहरूमा धेरै रेल दुर्घटनाहरू भएका छन्, यद्यपि घातक घटनाहरू भने पछिल्ला दशकहरूमा धेरै कम भएका छन् । 

सन् २०२२ मा गुइझोउ प्रान्तको रोङजियाङ काउन्टी नजिकै पहिरोको भग्नावशेषमा ठोक्किएर एउटा रेल पटरीबाट खसेको थियो, जसमा एक कन्डक्टरको मृत्यु भएको थियो र अन्य आठ जना घाइते भएका थिए । सन् २०२० मै हुनानको केन्द्रीय प्रान्तको चेन्झाउमा भएको रेल दुर्घटनामा एक जनाको मृत्यु भएको थियो र १२७ जना घाइते भएका थिए । 

चीनको सबैभन्दा ठुलो मानवीय क्षति भएको रेल दुर्घटना सन् २०११ मा भएको थियो । झेजियाङ प्रान्तको वेन्झाउमा एउटा द्रुत गतिको रेल स्थिर लोकोमोटिभसँग ठोक्किएको थियो, जसमा ४० जनाको मृत्यु भएको थियो र करिब २०० जना घाइते भएका थिए । त्यसअघि २००८ मा पूर्वी चीनको शान्डोङ प्रान्तको जिबो नजिकै दुई यात्रुवाहक रेल ठोक्किँदा करिब ६६ जनाको मृत्यु भएको थियो ।