'काम नगर्ने ठेकेदारको खुट्टा भाँच्नुस्, फरक पर्दैन': भौतिक पूर्वाधार मन्त्री सुनिल लम्सालको अराजक अभिव्यक्ति

प्रधानमन्त्री बालेन्द्र शाह (बालेन) का विश्वासपात्र मानिने भौतिक पूर्वाधार तथा यातायात मन्त्री सुनिल लम्सालको एक अभिव्यक्तिले नयाँ विवाद सिर्जना गरेको छ। विकास निर्माणका काममा ढिलासुस्ती गर्ने ठेकेदारप्रति आक्रोश व्यक्त गर्ने क्रममा उनले प्रयोग गरेको भाषाशैलीमाथि प्रश्न उठ्न थालेको हो।

काठमाडौँको सडक अनुगमनका बोल्दै मन्त्री लम्सालले काम नगर्ने ठेकेदारहरूमाथि कडा टिप्पणी गरेका थिए। सो क्रममा उनले, ‘काम नगर्ने ठेकेदारको खुट्टा भाँच्नुस्, फरक पर्दैन’ भन्ने अभिव्यक्ति दिएका थिए। उनले बिजुली पोल जडानसँग सम्बन्धित काममा भएको ढिलाइप्रति असन्तुष्टि जनाउँदै, “यो बिजुलो पोल वाला ठेकेदार यो धर्तीमा कहाँ छ, त्यसलाई लिएर आउनुस्, त्यसले काम गरेन भने खुट्टा भाँचिदिने,” भन्ने अभिव्यक्ति व्यक्त गरेका थिए।

मन्त्रीको उक्त अभिव्यक्ति सार्वजनिक भएसँगै सामाजिक सञ्जालमा व्यापक चर्चा सुरु भएको छ। केहीले विकास निर्माणका काममा वर्षौंदेखि हुने ढिलासुस्तीप्रति जनप्रतिनिधिको असन्तुष्टि स्वाभाविक भएको बताएका छन्। तर अर्कोतर्फ सार्वजनिक पदमा बसेको व्यक्तिले हिंसात्मक र उत्तेजक भाषा प्रयोग गर्नु उचित नहुने भन्दै आलोचना पनि भइरहेको छ।

कानुनी शासन र विधिको शासनको वकालत गर्ने राज्य संयन्त्रकै जिम्मेवार पदाधिकारीबाट यस्ता अभिव्यक्ति आउनुले गलत सन्देश जान सक्ने टिप्पणीसमेत हुन थालेको छ। ठेकेदारमाथि कारबाही गर्ने अधिकार कानुनी प्रक्रियाबाट प्रयोग गर्नुपर्ने भए पनि शारीरिक हिंसाको संकेत गर्ने भाषा प्रयोग गर्नु सार्वजनिक पदको मर्यादासँग मेल नखाने आलोचकहरूको भनाइ छ।

यद्यपि मन्त्री लम्सालको भनाइलाई समर्थकहरूले भने विकास निर्माणमा भइरहेको चरम लापरबाहीविरुद्धको आक्रोशका रूपमा व्याख्या गरेका छन्। तर उनको अभिव्यक्तिले सार्वजनिक पदाधिकारीको भाषा, जिम्मेवारी र कानुनी सीमाबारे नयाँ बहस भने सुरु गराएको छ।