बलात्कार मुद्दामा फुटबलर रोबिन्होलाई नाै वर्षको जेल सजाय

म्यानचेस्टर सिटी तथा रियल मड्रिडका पूर्वफरवार्ड रोबिन्होमाथि सन् २०१३ मा अल्बानियाकी २२ वर्षीया युवतीलाई सामूहिक बलात्कार गरेको अभियाेगमा यस्ताे फैसला सुनाइएकाे जनाएकाे छ ।  ब्राजिलमा बस्दै आएका ४० वर्षीय ब्राजिलियन खेलाडीलाई सन् २०१७ मा इटालीको अदालतले दोषी ठहर गरेको थियो । ब्राजिलले आफ्ना नागरिकलाई सुपुर्दगी नगर्ने भएकाले इटालीको आग्रहअनुसार बुधबार ब्राजिलको अदालतले उनलाई ब्राजिलमा रहेर सजाय भुक्तानी गर्नुपर्ने आदेश दिएको हो । यद्यपि, उक्त आदेशविरुद्ध पुनरावेदन गर्न मिल्ने भएकाले उनी हाललाई पक्राउ भने नपर्ने वकिलहरूले जानकारी दिएका छन् ।

घटना भएका बेला उनी इटालियन क्लब एसी मिलानमा आबद्ध थिए । उनले इटालीमा फैसलाविरुद्ध पुनरावेदन गरे पनि सन् २०२० मा उक्त मुद्दा हारेका थिए । सन् २०२२ मा इटालीको सर्वोच्च अदालतले उनीविरुद्धको सजायलाई कायम गरेको थियो । 

इटालीका अधिकारीहरूले त्यसपछि रोबिन्होविरुद्ध अन्तर्राष्ट्रिय पक्राउ पुर्जी जारी गरेको थियो । उनले उक्त घटना बलात्कार नभएर सहमतिमा भएको दाबी गर्दै आएका छन् । 

रोबिन्होले ब्राजिलका लागि १ सय अन्तर्राष्ट्रिय खेल खेलेका छन् । त्यस्तै, रियल मड्रिडमा दुईवटा लिग उपाधि जितेपछि उनी सन् २००८ मा बेलायतमा तत्कालीन कीर्तिमानी ३.२५ करोड पाउन्डमा म्यानचेस्टर सिटीसँग अनुबन्ध भएका थिए । दुई सिजनपछि उनी एसी मिलान पुगेका थिए । त्यहाँ उनले ५ वर्ष बिताए । मिलानपछि उनी चिनियाँ टोली ग्वानझाओ एभरग्रान्डे हुँदै ब्राजिलको एट्लेटिको मिनेरो पुगेका थिए ।