एमाले सांसद् बराल बोल्दै गर्दा आशिका तामाङ किन कड्किइन् ?

काठमाण्डु– प्रतिनिधिसभा बैठकमा एमाले सांसद यशोदा कुमारी बराल बोल्दै गर्दा राष्ट्रिय स्वतन्त्र पार्टी (रास्वपा) की सांसद् आशिका तामाङले आपत्ति जनाएकी छन् ।

बरालले आगामी आर्थिक वर्षको बजेटमा कर्णाली, मधेस र सुदूरपश्चिम प्रदेशलाई उपेक्षा गरेको आरोप लगाइन् । ३५ वर्षसम्म पुराना दलले मुलुक बिगारेको भन्दै रास्वपा सांसदहरुको आरोप स्वीकार्य नरहेको बरालको भनाइ थियो ।

‘यो सरकारले कर्णाली, सुदूरपश्चिम र मधेसलाई बेचेर तपाईंहरु सदनमा जुन ‘ब्लेम’ गर्नुहुन्छ । ३५ वर्ष पुरानाले के गरे भन्नुहुन्छ । यो विषयवस्तु नल्याउनुपर्ने हो । तर, तपाईंहरु लिफ्टबाट माथि चढ्नुभयो, हामी भर्याङबाट उक्लिन खोज्दैछौं । त्यति मात्र फरक हो, पुराना र नयाँ यहाँ कोही पनि छैनन् । म पनि नयाँ नै माननीय हुँ’ बरालले भनिन् ।

प्रधानमन्त्री बालेन्द्र शाह (बालेन) ले नेपालले पनि भारतको जमिन मिचेको भन्दा रास्वपा सांसदले ताली पड्काएको आरोप लगाइन् ।

बराल बोल्दै गर्दा तामाङले नियमापत्ति जनाइन् । सभामुख अर्यालले बराललाई बोल्न रोकेर तामाङलाई माइक दिन सचिवालयलाई निर्देशन दिए ।

तामाङले वर्तमान सरकारले कहाँ के बेचेको छ ? भन्दै बरालको भनाइमा आपत्ति जनाइन् ।

बेचेको प्रमाण पेश गर्न उनले चुनौती दिइन् । ‘उहाँले जे बेचेको भन्नुभएको छ । कहाँ बेचेको हो, त्यो उहाँले प्रमाण देखाउनुपर्यो । कसले बेच्यो ? कुन सरकारले बेच्यो ? यो सरकारले बेचेको तपाईंसँग प्रमाण छ ? के बेचेको भन्नुभएको तपाईंले ?’

आशिकाको आपत्तिपछि बरालले शिष्टाचार र सभ्यता उनीबाट सिक्नुपर्ने भन्दै व्यंग्य गरिन् ।