किन ट्रम्पले अन्तर्वार्ता बीचमै छोडेर हिँडे ?

काठमाडौं । अमेरिकी राष्ट्रपति डोनाल्ड ट्रम्पले एनबीसी न्यूजसँगको अन्तर्वार्ता बीचमै छोडेर हिँडेका छन् । आफ्नो चुनावी धाँधलीसम्बन्धी दाबीमाथि बारम्बार प्रश्न उठेपछि उनले अन्तर्वार्ता बीचमै छोडेर हिँडेका हुन् । 

आइतबार प्रसारण भएको ‘मिट द प्रेस’ कार्यक्रममा प्रस्तोता क्रिस्टेन वेल्करले ट्रम्पका विभिन्न दाबीमाथि प्रश्न उठाएपछि अन्तर्वार्ता तनावपूर्ण बनेको थियो । अन्ततः ट्रम्पले सञ्चारमाध्यमलाई ‘भ्रष्ट’ भन्दै अन्तर्वार्ता छोडेर बाहिरिएका थिए ।

अन्तर्वार्ताका क्रममा ट्रम्पले क्यालिफोर्नियामा हालै सम्पन्न प्राथमिक निर्वाचन (प्राइमरी) र सन् २०२० को राष्ट्रपतीय निर्वाचन दुवैमा धाँधली भएको दाबी दोहोर्‍याएका थिए ।

जब वेल्करले क्यालिफोर्नियाको निर्वाचनमा धाँधली भएको प्रमाण मागिन्, ट्रम्पले जवाफ दिए, “मैले देखेको र सुनेको कुरा नै पर्याप्त प्रमाण हो ।”

त्यसपछि वेल्करले प्रतिप्रश्न गर्दै भनिन्, “तर, त्यो प्रमाण होइन ।”

यसपछि ट्रम्प झन् आक्रोशित देखिए । उनले सञ्चारमाध्यमलाई ‘भ्रष्ट’ भन्दै प्रस्तोतामाथि पनि कटाक्ष गरे । “उनीहरू भ्रष्ट छन्, ठीक तपाईं जस्तै,” ट्रम्पले भने ।

वेल्करले त्यसको जवाफमा भनिन्, “निष्पक्ष रूपमा भन्नुपर्दा म भ्रष्ट छैन । तर, हामी कुराकानीलाई अगाडि बढाऔँ ।”

तर, ट्रम्प त्यसमा सहमत भएनन् । उनले वेल्करलाई “कि त भ्रष्ट, कि त मूर्ख” भएको आरोप लगाउँदै अन्तर्वार्ता टुंग्याउने घोषणा गरे ।

“अब यो बन्द गरौँ, किनभने मेरो लागि यति नै पर्याप्त छ । धन्यवाद प्रिय, राम्रो समय बिताउनुहोला,” ट्रम्पले भने ।
यो अन्तर्वार्ता विस्कन्सिन राज्यमा किसानहरूसँगको एक कार्यक्रममा सहभागी हुने क्रममा एउटा गोठभित्र रेकर्ड गरिएको थियो । एनबीसीका अनुसार वर्षा, प्राविधिक समस्या तथा धातुको छानामा परेको पानीको ठूलो आवाजका कारण अन्तर्वार्ता पटक–पटक प्रभावित भएको थियो ।

राष्ट्रपति ट्रम्प करिब ५० मिनेटसम्म अन्तर्वार्तामा सहभागी भएका थिए ।

अन्तर्वार्ताको अधिकांश समय इरानसँगको तनाव, अमेरिकी सैन्य नीति तथा विदेश नीतिका विषयमा केन्द्रित थियो ।