मध्यपूर्वमा पुनः युद्धको शंखघोषः इरानद्वारा इजरायलमाथि मिसाइल प्रहार, गाजाका सबै नाका बन्द

 इजरायल, इरान र अमेरिकाबिच गत अप्रिलमा भएको युद्धविराम सम्झौतापछि पहिलो पटक इरानले इजरायलमाथि मिसाइलको वर्षा गरेको छ । इरानको इस्लामिक रिभोलुसनरी गार्ड्स (आईआरजीसी) ले यो आक्रमण ‘एक हप्तासम्म चल्ने निरन्तर प्रहार’ को सुरुवात भएको घोषणा गरेको छ ।

 

इजरायली सेनाका अनुसार इरानले प्रहार गरेका मिसाइलहरूलाई देशको उत्तरी क्षेत्रमा आकाशमै नष्ट (इन्टरसेप्ट) गरिएको छ र हालसम्म कुनै मानवीय क्षतिको विवरण प्राप्त भएको छैन । आइतबार बिहान इजरायलले लेबनानको राजधानी बेरुतस्थित हिजबुल्लाहका ठेगानाहरूमा आक्रमण गरेपछि इरानले त्यसको कडा जवाफ दिने चेतावनी दिएको थियो ।

 

यस घटनालाई लिएर इजरायली सैन्य प्रवक्ताले इरानले ‘गम्भीर गल्ती’ गरेको टिप्पणी गरेका छन् । यस्तै, फक्स न्यूजका अनुसार अमेरिकी राष्ट्रपति डोनाल्ड ट्रम्पले इरानलाई तत्काल आक्रमण रोकेर वार्ताको टेबुलमा फर्कन आग्रह गरेका छन् । बीबीसीका अनुसार इरानले आफ्नो धम्कीलाई व्यवहारमा उतारेको छ, तर अबको परिस्थिति इजरायलले दिने जवाफी प्रतिक्रियामा निर्भर रहने देखिन्छ ।

 

इरानी आक्रमण लगत्तै इजरायली सरकारी निकायले सुरक्षा संवेदनशीलतालाई ध्यानमा राख्दै गाजा प्रवेश गर्ने सबै नाकाहरू बन्द गर्ने निर्णय गरेको छ । अर्को सूचना जारी नभएसम्मका लागि केरेम शालोम र रफाह लगायतका सबै नाकाहरू पूर्ण रूपमा बन्द रहने इजरायलले जनाएको छ ।