रुसी राष्ट्रपति पुटिन र अर्मेनियाली प्रधानमन्त्री पाशिन्यानबीच छलफल

 रुसी राष्ट्रपति भ्लादिमिर पुटिन र अर्मेनियाका प्रधानमन्त्री निकोल पाशिन्यानबीच सोमबार टेलिफोन वार्ता भएको छ।

क्रेमलिनका अनुसार राष्ट्रपति पुटिनले गत शुक्रबार अस्तानामा सम्पन्न ‘सुप्रिम युरेसियन इकोनोमिक काउन्सिल’ को बैठकका परिणामहरूका बारेमा प्रधानमन्त्री पाशिन्यानसँग छलफल गरेका हुन्।

क्रेमलिनका प्रवक्ता डमित्री पेस्कोभले यस वार्तालाई युरेसियन इकोनोमिक युनियनको पछिल्लो बैठकमा भएका छलफलहरूलाई निरन्तरता दिने राम्रो अवसरका रूपमा व्याख्या गरेका छन्। सो अवसरमा राष्ट्रपति पुटिनले प्रधानमन्त्री पाशिन्यानलाई जन्मदिनको शुभकामना समेत दिएका थिए।

अर्मेनियाली पक्षका अनुसार प्रधानमन्त्री पाशिन्यानले विभिन्न विवादित मुद्दाहरूमा सन्तुलित धारणा राखेकोमा राष्ट्रपति पुटिनलाई धन्यवाद दिएका छन्। दुई नेताबीच द्विपक्षीय र बहुपक्षीय एजेन्डाका समसामयिक विषयमा विचार आदानप्रदान हुनुका साथै निकट भविष्यमै भेटवार्ता गरी संवादलाई अगाडि बढाउने सहमति समेत भएको छ।