कोसीमा गठबन्धनले पनि कार्कीलाई विश्वासको मत दिने, सरकारबाटै बाहिरिने एमालेको चेतावनी
यो समाचार बर्णन मिडियाका प्रधान सम्पदक तथ संचालक नारायण प्रसाद दाहाल ज्युले लेख्नु भएको हो।
काठमाडौँ । विश्वासको मत प्राप्त गर्न नसकी एक वर्षमै चारवटा सरकार धरापमा परिसकेको कोशी प्रदेशमा नवनियुक्त मुख्यमन्त्री केदार कार्कीलाई भने आवश्यकताभन्दा बढी मत जुट्ने भएको छ । कांग्रेसका ८ जना सांसद र एमालेको साथ लिएर मुख्यमन्त्री पदमा दाबी गरेका कार्कीका पक्षमा एमाले मात्र होइन, केन्द्रमा सरकार चलाइरहेको सिंगो गठबन्धन नै तयार भइसकेको छ ।
केन्द्रीय सत्ता गठबन्धनका नेताहरु कोशी सरकारबाट फेरि पनि एमालेलाई बाहिर पारेर साविककै संरचना ब्युँताउने कसरतमा छन् । तर, कांग्रेसबाहेक साविक गठबन्धनका कुनै पनि घटकलाई सरकारमा सामेल गराउने कुरा आए आफूले साथ नदिने एमालेले स्पष्ट पारेको छ । सर्वदलीय सरकार वा कुनै पनि नाममा गठबन्धनलाई सत्तामा हावी गराउने कुरा मान्य नहुने एमाले नेताहरुले चेतावनी नै दिएका छन् ।
कार्की कांग्रेसमा शेखर कोइरालानिकट नेता हुन् । कोइरालाले शनिबारै गठबन्धनप्रति पूर्ववत्रुपमा प्रतिबद्ध रहेको भनी बालुवाटारमा एक बुँदे चिर्कटो सहमति नै गरेका थिए । तर, त्यसको भोलिपल्ट कार्कीले एमालेलाई समेत सरकारमा सामेल गरेर चिर्कटो सहमतिलाई औचित्यहीन तुल्याइदिएका थिए । बालुवाटारका कुनै सहमति वा निर्देशन नमान्ने स्पष्ट जनाउ उनले दिएपछि प्रधानमन्त्री पुष्पकमल दाहाल तनावग्रस्त छन् ।
गत वर्ष एमालेको सहयोगमा सत्ताको सिँढी चढेका प्रधानमन्त्री पुष्पकमल दाहाल प्रचण्डलाई कांग्रेसले पनि विश्वासको मत दिँदा एमाले अध्यक्ष केपी शर्मा ओलीले ढोक्सा थापेको आरोप लगाएका थिए । नभन्दै माओवादीले एमालेको साथ छाडेर कांग्रेसतिर लहसिएको थियो । अहिले पनि केन्द्रीय गठबन्धनले कार्कीलाई विश्वासको मत दिने कुराले एमालेलाई त्यस्तै चिन्ता थपेको छ ।
कांग्रेस सिंगो आउँछ भने ठीकै छ तर त्यसबाहेकका घटकलाई पनि सरकारमा सामेल गराउने कुरामा सहमत हुन नसकिने एमालेको अडान छ । केन्द्रीय गठबन्धन लागू गर्न खोजिए सरकारबाट बाहिरिने चेतावनी एमालेले कार्कीलाई दिएको छ ।
त्यसो त मुख्यमन्त्री कार्कीसँग शक्ति साझेदारी र सरकार सञ्चालनका विषयमा आधारभूत छलफल र समझदारी सोमबारमंगलबार मुख्यमन्त्री तथा मन्त्रिपरिषदको कार्यालयमा भएको थियो । ९ मन्त्रालयमध्ये एमालेलाई ५ र कांग्रेसलाई ४ हुनुपर्ने एमालेको प्रस्ताव छ। त्यसमा कार्कीले फरक मत राखेका छैनन्।
एमालेले साथ छाडेर पुनः साविककै गठबन्धनमा फर्किने हो भने कार्की सरकारसँगै प्रदेश सभा पनि संकटमा पर्छ। त्यसपछि मध्यावधि निर्वाचनमा जानुपर्ने हुन्छ । यसकारण एमालेको साथ छाडेर गठबन्धनको छाता रोज्न कार्कीलाई सहज र सुरक्षित छैन ।
प्रतिक्रिया