कोशी प्रदेशमा आज सानो आकारको मन्त्रिमण्डल बनाइँदै, एमाले सहभागी हुने, माओवादी खाली हात
यो समाचार बर्णन मिडियाका प्रधान सम्पदक तथ संचालक नारायण प्रसाद दाहाल ज्युले लेख्नु भएको हो।
काठमाडौँ । कोशी प्रदेशका नवनियुक्त मुख्यमन्त्री केदार कार्कीले आज शपथलगत्तै सानो आकारको मन्त्रिमण्डल बनाउने भएका छन्। पहिलो चरणमा एकजना कार्कीका तर्फबाट र कम्तीमा एकजना एमालेका तर्फबाट मन्त्रिमण्डलमा सामेल गराइने भएको छ। आज कम्तीमा ३ र बढीमा ४ सदस्यीय मन्त्रिमण्डल गठन हुने एमाले संसदीय दलका प्रमुख सचेतक रेवतीरमण भण्डारीले जानकारी दिए । सम्भावित मन्त्रीको नाम पनि तय भइसकेको तर अन्तिम समयसम्म कुनै फेरबदल हुन सक्ने भएकाले सार्वजनिक नगरिएको नेताहरूले बताएका छन्।
बाँकी शक्ति साझेदारीका कुरा विश्वासको मत लिएपछि मात्र गर्ने समझदारी भएको भण्डारीको भनाइ छ। आगामी मार्गचित्र र शक्ति साझेदारीबारे शीर्ष तहमा छलफल गर्न मुख्यमन्त्री कार्की शनिबार नै काठमाडौँ आएका थिए । काठमाडौंमा उनले नेता शेखर कोइरालालगायतसँग छलफल गरेका थिए ।
यो सरकारमा माओवादीलाई सामेल गराउने कि नगराउने भन्नेचाहिँ केही छलफल नभएको भण्डारीको भनाइ छ । नेकपा माओवादी केन्द्रका कोशी प्रदेश सभा संसदीय दलका नेता इन्द्र आङ्बोले नवनियुक्त मुख्यमन्त्री केदार कार्कीले आफ्नो कित्ता स्पष्ट पार्नुपर्ने बताएका छन् । कार्की एमालेको मुख्यमन्त्री हो कि गठबन्धनको भनेर कित्ता स्पष्ट पार्नुपर्ने र त्यसपछि माओवादी सहभागी हुने–नहुने कुरामा प्रवेश हुने उनको भनाइ छ ।
प्रधानमन्त्री एवं माओवादी अध्यक्ष पुष्पकमल दाहालले मुख्यमन्त्री कार्कीलाई गठबन्धनले विश्वासको मत दिने बताएका छन् । कांग्रेस सभापति देउवा, प्रधानमन्त्री प्रचण्ड र शेखर कोइरालाले शनिबार बिहानै गठबन्धन यथावत् राख्ने सहमति गरेका थिए । अब कांग्रेसले एमालेसँग सहकार्य गर्ने कि पूर्ववत् गठबन्धनमा रहने भन्ने प्रश्न पनि यस घटनाले जन्माएको छ।
यसैबीच, पूर्वमुख्यमन्त्री उद्धव थापाले कांग्रेसको कोशी प्रदेश सभा संसदीय दलका नेताको पदबाट राजीनामा दिएका छन्। कांग्रेस संस्थापनले अब कार्कीलाई संसदीय दलको नेता बनाएर केन्द्रीय सत्ता गठबन्धनअनुसारकै सरकार बनाउन प्रयास गरिरहेको छ। तर, शेखर कोइराला संरक्षित कांग्रेसको विद्रोही समूहले पूर्ववत् गठबन्धनमा रहने निर्णय लिन्छ वा एमालेसँगको सहमतिअनुसार पाइला चाल्छ, सबैको चासो यसैमा केन्द्रित भएको छ।
प्रतिक्रिया