जिल्लामै सर्वसुलभ स्वास्थ्य उपचार सेवा उपलब्ध हुनुपर्छ : प्रदेश प्रमुख जोशी

सुदूरपश्चिम प्रदेशका प्रमुख देवराज जोशीले जनताको सहज पहुँच पुग्ने गरी स्वास्थ्य सेवा विस्तार गर्नुपर्ने बताउनुभएको छ ।

आज धनगढीमा सुरु भएको आर्थिक वर्ष २०७९/८० मा सम्पादित स्वास्थ्य कार्यक्रमको सुदूरपश्चिम प्रदेशस्तरीय एकीकृत वार्षिक स्वास्थ्य समीक्षा गोष्ठीमा प्रदेश प्रमुख जोशीले दूरदराजका जनताले जिल्लामै सर्वसुलभ स्वास्थ्य उपचार सेवा पाउने व्यवस्था गर्नुपर्नेमा जोड दिनुभयो ।

गोष्ठीमा मुख्यमन्त्री कमलबहादुर शाहले सरकारले समग्र स्वास्थ्य क्षेत्रको विकासलाई प्राथमिकता दिएको बताउनुभयो । मुख्यमन्त्रीले भन्नुभयो, “स्वास्थ्य क्षेत्रका लागि सरकारले बजेटको अभाव हुन दिने छैन ।” सामाजिक विकास मन्त्री झपटबहादुर साउदले सरकारले स्वास्थ्य क्षेत्रको सुधारका लागि एकीकृत नीति, योजना अघि बढाउन लागेको जानकारी दिनुभयो ।

गोष्ठीमा गत आवमा भएका कामको समीक्षाका साथै मानसिक स्वास्थ्य प्रवर्द्धन न्यूनीकरण र लागुऔषधको रोकथाम, स्वास्थ्य जनशक्तिको उत्पादन व्यवस्थापन, स्वास्थ्य सेवामा स्थानीय र प्रदेश सरकारको भूमिकालगायतका विषयमा प्रस्तुतीकरण र छलफल हुने भएको छ ।

तीन दिने गोष्ठीमा प्रदेश सरकार, सामाजिक विकास मन्त्रालय र मातहतका कार्यालयका प्रमुख एवं प्रतिनिधि, स्वास्थ्य क्षेत्रका विज्ञलगायतको सहभागिता रहेको छ ।

स्वास्थ्य निर्देशनालयका आशुतोष श्रेष्ठले आर्थिक वर्ष २०७८/०७९ को तुलनामा आव २०७९÷८० मा प्रदेशको तराईका कैलाली र कञ्चनपुर जिल्लाका स्वास्थ्य सूचकाङ्क वृद्धि भए पनि पहाडी क्षेत्रका जिल्लामा यो सूचकाङ्क घटेको बताउनुभयो ।