युट्युबर मिस्टर बिस्टले रचे इतिहास, ५० करोड सब्सक्राइबर पुर्‍याउने विश्वकै पहिलो क्रिएटर

काठमाडौँ । अमेरिकी युट्युबर जिमी डोनाल्डसन अर्थात् मिस्टर बिस्ट युट्युबको इतिहासमा नयाँ कीर्तिमान कायम गर्दै ५० करोड (५०० मिलियन) सब्सक्राइबरको आँकडा पूरा गरेका छन् । शुक्रबार यो आँकडा पार गर्दै उनी युट्युबको इतिहासमा यति ठुलो संख्यामा सब्सक्राइबर पाउने पहिलो क्रिएटर बनेका हुन् ।

मिस्टर बिस्ट सन् २०२२ नोभेम्बरमा सबैभन्दा धेरै सब्सक्राइबर भएको व्यक्तिगत क्रिएटर बनेका थिए भने भने सन् २०२४ जुनमा युट्युबकै सबैभन्दा धेरै सब्सक्राइबर भएको च्यानल बनेको थियो । उनको ‘स्क्विड गेम इन रियल लाइफ’ भिडिओ १ अर्ब भ्युजको नजिक पुगेको छ । जसलाई उनको च्यानलको एउटा कोशेढुङ्गा मानिन्छ । उनले ‘५० युट्युबरबिच १० लाख डलरको प्रतिस्पर्धा’ जस्ता ठुला इभेन्ट आयोजना गरेर युट्युब कन्टेन्टलाई नयाँ उचाइमा पुर्‍याएका छन् ।

५० करोड सब्सक्राइबर पुग्नै लाग्दा उनले आफ्नो च्यानलबाट लाइभ स्ट्रिम गरेका थिए, जसलाई ६ लाखभन्दा बढी मानिसले लाइभ हेरेका थिए । उक्त ऐतिहासिक क्षणमा उनका प्रशंसकहरूले रमाइलो गर्दै केही बेर अनसब्सक्राइब र फेरि सब्सक्राइब गरेर उनलाई जिस्क्याएका थिए । 

५० करोडको लक्ष्य पूरा भएपछि भावुक बनेका मिस्टर बिस्टले आफ्नो संघर्षपूर्ण विगत सुनाएका छन् । उनले सन् २००८ को आर्थिक संकटका बेला आफ्नो परिवार टाट पल्टेको र सुरुवाती दिनमा भिडिओ उपकरण किन्न विज्ञापनबाट आउने पैसा (एडसेन्स) बचत गर्नुपरेको स्मरण गरे ।  

“मैले ११ वर्षको उमेरमा युट्युब फेला पारेँ र यसैमा आफ्नो सर्वस्व सुम्पिएँ,” उनले भने, “कुनै पनि कुरामा निपुण हुन १० हजार होइन, १ लाख घण्टा लाग्छ भन्ने मलाई लाग्छ । म आफैँ युट्युब भिडियो बनाउन करिब ६० देखि ७० हजार घण्टा खर्च गरिसकेको छु ।” उनले आफ्ना प्रशंसकहरूलाई सपना पछ्याउन र मेहेनत गर्न प्रेरित समेत गरे ।

उनले ५०० मिलियन सब्सक्राइबर विशेष भिडिओ आज (शनिबार) रिलिज गर्ने घोषणा पनि गरेका छन् । भविष्यमा उनले भिडिओको सिनेमेटोग्राफी अझ सुन्दर र परिष्कृत बनाउने, मानिसहरूलाई मद्दत गर्ने र आफ्नो चकलेट कम्पनी  (Feastables)  मार्फत काम गर्ने योजना रहेको बताएका छन् । “म अझ बढी प्रेरित र दृढ छु । युट्युबमा अझै २०-३० वर्ष काम गर्न सक्छु,” उनले थपे ।

मिस्टर बिस्टले परोपकारलाई पनि आफ्नो मिसन बनाएका छन् । २० मिलियन सब्सक्राइबर पुग्दा उनले #TeamTrees अभियान सुरु गरेर २५ मिलियन डलरभन्दा बढी उठाई २५ मिलियन रूख रोपे । #TeamSeas ले ३० मिलियन डलरभन्दा बढी उठाएर समुद्र, नदी र तटबाट फोहोर हटायो । सन् २०२५ मा मार्क रोबरसँग मिलेर #TeamWater अभियान मार्फत ११५ देशका क्रिएटरहरूले WaterAid लाई ४० मिलियन डलर जुटाए ।