काभ्रेको बुचाकोटमा बस दुर्घटना हुँदा सातको मृत्यु, १७ घाइते

 काभ्रेको नमोबुद्ध नगरपालिका-२ बुचाकोटमा शुक्रबार भएको बस दुर्घटनामा सात जनाको मृत्यु भएको छ भने १७ जना घाइते भएका छन्।

बनेपाबाट रोशी गाउँपालिकाको खार्पाचोक हुँदै सुँगुरेतर्फ जाँदै गरेको बा.३ ख ८३९८ नम्बरको अरनिको यातायातको बस बीपी राजमार्गबाट करिब २०० मिटर तल खसेर दुर्घटनामा परेको जिल्ला प्रहरी कार्यालय काभ्रेका डीएसपी रविन विष्टले जानकारी दिए ।

प्रहरीका अनुसार बसमा २५ देखि ३० जना यात्रु सवार रहेको प्रारम्भिक अनुमान गरिएको छ।

दुर्घटनामा घाइते भएका १७ जनालाई उद्धार गरी उपचारका लागि धुलिखेल अस्पताल पठाइएको र अन्य घाइतेहरूको उद्धार तथा खोजी कार्य जारी छ।

घटनास्थलमा प्रहरी, स्थानीयवासी र उद्धारकर्मीको टोली परिचालित भएको छ। मृतक र घाइतेहरूको पहिचान खुलाउने तथा दुर्घटनाको विस्तृत विवरण सङ्कलन गर्ने काम भइरहेको प्रहरीले जनाएको छ।