जासुसी गरेको आशङ्कामा चीनमा एक अमेरिकी अनुसन्धानकर्ता पक्राउ

चीनले जासुसी गरेको आशङ्कामा एक अमेरिकी अनुसन्धानकर्तालाई पक्राउ गरेको जनाइएको छ । 

चिनियाँ विदेश मन्त्रालयले शुक्रबार उक्त व्यक्तिलाई ‘जासुसी’ गरेको तथा ‘राष्ट्रिय सुरक्षामा खतरा पुर्‍याएको’ आरोपमा नियन्त्रणमा लिइएको पुष्टि गरेको हो ।

पक्राउ परेका व्यक्ति म्यानमारको राजनीति, स्रोतसाधन र द्वन्द्वसम्बन्धी अध्ययन गर्ने थिंक ट्याङ्क ‘इन्स्टिच्युट फर स्ट्राटेजी एन्ड पोलिसी–म्यान्मार (आईएसपी–एम)’ का संस्थापक मिन जिन रहेको बताइएको छ । अमेरिकी तथा म्यानमारको दोहोरो नागरिकता भएका उनलाई जुनको सुरुआतमा हिरासतमा लिइएको अमेरिकी सञ्चारमाध्यमहरूले जनाएका थिए ।

चीनका विदेश मन्त्रालयका प्रवक्ता लिन जियानले मिन जिनमाथि आपराधिक अनुसन्धानअन्तर्गत कारबाही भइरहेको र उनको पक्राउबारे ग्वाङझाउस्थित अमेरिकी महावाणिज्य दूतावासलाई जानकारी गराइएको बताए ।

सन् २०२१ को सैनिक ‘कू’ पछि गृहयुद्धमा फसेको म्यानमारसम्बन्धी अध्ययन गर्ने अनुसन्धानकर्ताको गिरफ्तारी चीन–अमेरिका सम्बन्ध सुधारको प्रयास भइरहेका बेला भएको हो । यसैबिच म्यानमारका राष्ट्रपति मिन आङ ह्लाइङ जुन १५ देखि १९ सम्म चीन भ्रमणमा जाने कार्यक्रम सार्वजनिक भएको छ ।