नेपाल घुम्ने पर्यटकको दोब्बर रकम खर्चिन्छन् विदेश जाने नेपाली

काठमाडौं । नेपाल घुम्न आउने विदेशी पर्यटकले नेपालमा जति खर्च गर्छन् त्यसको दुईगुणाभन्दा बढी खर्च नेपालीले विदेश जाँदा गरेको पाइएको छ ।
 
नेपाल राष्ट्र बैंकले सार्वजनिक गरेको विवरणअनुसार चालु आर्थिक वर्ष २०८२/८३ को पहिलो १० महिनामा विदेशी पर्यटकले नेपालमा ७४ अर्ब १८ करोड रुपैयाँ गरेका छन् । यो अघिल्लो आर्थिक वर्ष २०८१/८२ को पहिलो १० महिनाको तुलनामा २.२ प्रतिशतले कम हो ।

अघिल्लो आर्थिक वर्षको पहिलो १० महिनामा नेपाल घुम्न आउने पर्यटकले ७५ अर्ब ८३ करोड रुपैयाँ खर्च गरेको राष्ट्र बैंकको तथ्यांकले देखाउँछ ।

चालु आर्थिक वर्ष २०८२/८३ को पहिलो १० महिनामा नेपाली विदेश जाँदा देशबाट एक खर्ब ७७ अर्ब ८७ करोड रुपैयाँ बाहिरिएको छ । अघिल्लो आर्थिक वर्ष २०८१/८२ को पहिलो १० महिनाको तुलनामा चालु आर्थिक वर्षको सोही अवधिमा नेपाली विदेश जाँदा बाहिरिने रकम ३.४ प्रतिशतले कमी आएको छ ।
 
अघिल्लो आर्थिक वर्ष २०८१/८२ को पहिलो १० महिनामा नेपाली विदेश जाँदा एक खर्ब ८४ अर्ब २२ करोड रुपैयाँ देशबाट बाहिरिएको थियो । 

नेपालमा घुम्न आउने पर्यटकले जति रकम नेपालमा खर्च गरेका छन् विदेश जाँदा नेपालीले त्यसको २.३९ गुणा बढी रकम खर्च गरेको देखिएको छ । 

राष्ट्रबैंकका अनुसार विदेश जाने नेपालीमध्ये अध्ययनको लागि विदेश जाने विद्यार्थीमार्फत सबैभन्दा ठूलो रकम देशबाट बाहिरिने गरेको छ । चालु आर्थिक वर्ष २०८२/८३ को पहिलो १० महिनामा विदेश पढ्न जाने नेपाली विद्यार्थीसँगै एक खर्ब २० अर्ब ५० करोड रुपैयाँ देशबाट बाहिरिएको छ ।

अघिल्लो आर्थिक वर्षको सोही अवधिमा यस्तो रकम एक खर्ब १२ अर्ब ३९ करोड रुपैयाँ रहेको थियो ।