अन्तरवार्ताको बिचमै रिसाएर किन हिँडे ट्रम्प ?

अमेरिकी राष्ट्रपति डोनाल्ड ट्रम्प अमेरिकी टेलिभिजन एनबीसी न्युजको ‘मिट द प्रेस’ नामक अन्तर्वार्ता चलिरहेको बेलामा रिसाएर हिँडेका छन् । सन् २०२० को राष्ट्रपति चुनाव र ६ जनवरीको दंगासम्बन्धी प्रश्नहरूमाथि चर्को विवाद भएपछि उनले बिचमै अन्तर्वार्ता छोडेका हुन् ।

अन्तर्वार्ता पत्रकार क्रिस्टिन वेल्करसँग भएको थियो । जसमा ट्रम्पले पुनः २०२० को चुनाव धाँधली गरेको आधारहीन दाबी दोहोर्‍याएका थिए । वेल्करले क्यालिफोर्नियाको गभर्नर चुनाव प्रक्रिया र मतगणनाबारे प्रश्न गर्दा ट्रम्पले त्यसलाई अस्वीकार गर्दै पत्रकारमाथि नै आक्रोश व्यक्त गरेका थिए ।

ट्रम्पले एनबीसी र कार्यक्रमलाई भ्रष्ट भन्दै आरोप लगाएपछि स्थिति थप तनावपूर्ण बनेको थियो । उनले पत्रकारलाई ‘तँ या त भ्रष्ट छस् कि मूर्ख छेस्’ भनेर टिप्पणीसमेत गरे ।

वेल्करले प्रमाण मागेपछि ट्रम्पले कुनै ठोस प्रमाण प्रस्तुत नगरी चुनावमा धाँधली भएको दाबी दोहोर्‍याए । पछि ट्रम्पले मलाई पुग्यो भनेर माइक्रोफोन उतारेर अन्तर्वार्ता बिचमै छाडे ।

त्यसपछि वेल्करले ट्रम्पलाई अन्तर्वार्ताकै लागि भनेर आफू विस्कन्सिन आएको कुरा सम्झाइन् । यसको जवाफमा ट्रम्पले ‘म तिमीसँग एक घण्टादेखि झरीमा बसिरहेको छु, पानी पर्दै रोकिँदै गरिरहेको छ । मैले त तिमीलाई पर्याप्त समय दिइसके । तिमीले आफ्नो प्रेसलाई सिधा गर्नुपर्छ,’ भनेर हिँडे ।

अन्तर्वार्ता चलिरहँदा ट्रम्पले ६ जनवरी २०२१ मा भएको अमेरिकी क्यापिटल भवन आक्रमणमा दोषी ठहरिएका व्यक्तिहरूबारे पनि विवादास्पद टिप्पणी गरेका थिए । उनले ती व्यक्तिहरूलाई सङ्घीय अनुसन्धान निकाय (एफबीआई) ले भवनमा प्रवेश गर्न उत्साहित गरेको जस्तो आधारहीन दाबी गरेका थिए । साथै, उनीहरूले कडा सजायको डरले दोष स्वीकार गरेको बताएका थिए ।

ट्रम्प आफैँले प्रस्ताव गरेको ‘एन्टी–वेपनाइजेशन फन्ड’ अन्तर्गत ती व्यक्तिहरूलाई क्षतिपूर्ति दिने सम्भावनाबारे सोध्दा उनले स्पष्ट जवाफ दिन मानेनन् । अन्तर्वार्ता विस्कन्सिनमा गरिएको थियो र प्रसारण आइतबार गरिएको थियो । एनबीसी न्युजले ट्रम्पको अचानक अन्तर्वार्ता छोडाइबारे तत्काल कुनै प्रतिक्रिया दिएको छैन ।