‘प्राइभेट भिल्ला पार्टी’को नाममा ठगेको आरोपमा युवक पक्राउ

प्राइभेट भिल्ला पार्टीको नाममा सामाजिक सञ्जालबाट ठगी गर्ने एक जना युवकलाई प्रहरीले पक्राउ गरेको छ । पक्राउ पर्नेमा भारतीय नागरिक शुभम मोहन्ती छन् । 

उनलाई बिहीबार बसन्तपुरबाट पक्राउ गरिएको उपत्यका अपराध अनुसन्धान कार्यालयका एसपी शरद थापाले  बताए । १९ वर्षीय मोहन्तीले सामाजिक सञ्जाल काठमाडौँको अज्ञात ठाउँमा प्राइभेट भिल्ला पार्टी गरिने भन्दै फेसबुक रिल्स, टिकटक र विभिन्न पेजमा निश्चित रकम तिरेपछि युवती उपलब्ध गराउने प्रलोभन देखाएर ठगी धन्दा चलाएको प्रहरीको प्रारम्भिक अनुसन्धान निष्कर्ष छ ।

विज्ञापन हेरेर पार्टीमा सहभागी हुन चाहनेहरूबाट अनलाइन माध्यमबाट रकम लिएपछि उनी सम्पर्क विहीन हुने गरेको थाहा भएको छ । ‘पार्टी इन्टरटेनमेन्ट सर्भिस’ नामको पेजबाट एआईजी निर्मित भिडियोमा काठमाडौँमा एक्सक्लुसिभ प्राइभेट पार्टी आयोजना हुने दाबी गरेको विज्ञापन भेटिएको छ ।

आरोपीले सुरुमा पार्टीमा सहभागी हुन १० हजारको टिकट किन्नुपर्ने बताउँछन् । ग्राहकलाई सम्पर्कमा ल्याएपछि उनले आकर्षक युवतीहरूको तस्बिर पठाएर ३० हजारसम्मको प्याकेजको लोभ देखाएर ठग्ने गरेको प्रहरीको प्रारम्भिक अनुसन्धान निष्कर्ष छ । आरोपीमाथि प्रहरीले अनुसन्धान गरिरहेको छ ।