२१ करोड सम्पत्ति शुद्धीकरण मुद्दा: ४० वकिलको बहसपछि पनि टिकटकर तुलसी अधिकारी हिरासतमै!

ललितपुर, २१ जेठ ।
वैदेशिक रोजगारी र विभिन्न प्रलोभन देखाएर करोडौँ रकम ठगी गरेको आरोप लागेकी चर्चित टिकटकर तुलसी अधिकारीको थुनछेक बहस नसकिएपछि उनलाई पुनः प्रहरी हिरासतमै राखिएको छ । ललितपुर जिल्ला अदालतका न्यायाधीश टेकनाथ गौतमको इजलासमा सबै वकिलहरूको बहस नसकिएपछि मुद्दालाई 'हेर्दाहेर्दै' मा राखिएको हो ।

४० जना वकिलद्वारा वकालतनामा दर्ता

अधिकारीको पक्षबाट बहस गर्न बुधबार ४० जना स्वयंसेवी वकिलहरूले वकालतनामा पेश गरेका थिए । प्रतिवादीका तर्फबाट कानुन व्यवसायीहरूको संख्या ठूलो भएकाले बुधबार दिनभर बहस हुँदा पनि थुनछेक आदेश आउन सकेन । अदालतले मुद्दालाई 'हेर्दाहेर्दै' मा राख्दै बिहीबारका लागि निरन्तरता दिएको छ ।

२१ करोडको सम्पत्ति शुद्धीकरण र संगठित अपराधको मुद्दा

नेपाल सरकार वादी रहेको यस मुद्दामा अधिकारीमाथि गम्भीर आरोपहरू लागेका छन्:

बिगो दाबी: ६ करोड ५२ लाख रुपैयाँ ठगी ।

सम्पत्ति शुद्धीकरण: २१ करोड रुपैयाँको स्रोत नखुलेको सम्पत्ति शुद्धीकरण तथा संगठित अपराध ।

प्रतिवादी संख्या: कुमार चिमोरियाको जाहेरी रहेको यस मुद्दामा अधिकारी र अशोककुमार अग्रवालसहित १० जनालाई प्रतिवादी बनाइएको छ ।

चीन र थाइल्याण्ड हुँदै इन्टरपोलको सहयोगमा पक्राउ

वि.सं. २०८२ भदौदेखि फरार रहेकी अधिकारी नेपाल प्रहरीको अनुसन्धानबाट बच्न चीन हुँदै थाइल्याण्ड पुगेकी थिइन् । नेपाल प्रहरीको अनुरोधमा अन्तर्राष्ट्रिय अपराध नियन्त्रण संगठन (इन्टरपोल) ले रेड नोटिस जारी गरेपछि उनलाई गत शुक्रबार थाइल्याण्डबाट पक्राउ गरी नेपाल ल्याइएको थियो ।

अदालतको अर्को इजलासले बहस समाप्त गरेपछि मात्र उनलाई थुनामा राखेर मुद्दा पूर्पक्ष गर्ने वा धरौटीमा छाड्ने भन्नेबारे अन्तिम निर्णय (थुनछेक आदेश) आउनेछ ।