बलि हुनबाट जोगियो ‘डोनाल्ड ट्रम्प’ भैंसी, अब चिडियाखानामा बस्ने

बंगलादेशमा सामाजिक सञ्जालमा भाइरल बनेको एक अनौठो अल्बिनो (सेतो-गुलाबी) भैंसी बलि हुनबाट जोगिएको छ। अमेरिकी राष्ट्रपति डोनाल्ड ट्रम्पको हेयरस्टाइलसँग मिल्दोजुल्दो सुनौलो कपाल भएका कारण यसको नाम ‘डोनाल्ड ट्रम्प’ राखिएको थियो।

मुस्लिमहरूको महान् पर्व ईद-अल-अधा (बकर ईद) मा बली चढाउनका लागि पुरानो ढाकाका एक व्यवसायीले नारायणगञ्जस्थित राबेया एग्रो फार्मबाट यो ७०० केजीको भैंसी खरिद गरेका थिए। तर, यसको अनौठो लुक्स, गुलाबी छाला, र सुनौलो कपालका कारण सामाजिक सञ्जालमा भिडियो भाइरल भएपछि फार्ममा सेल्फी खिच्ने र हेर्नेहरूको हजारौँको भीड लाग्न थाल्यो।

अत्यधिक जनचासो र सुरक्षा चुनौतीलाई ध्यानमा राख्दै बंगलादेश सरकारले यस विषयमा विशेष चासो देखायो। गृहमन्त्री सलाहउद्दीन अहमदको प्रत्यक्ष निर्देशनमा खरिदकर्तालाई रकम फिर्ता गराई भैंसीलाई बलि दिनबाट जोगाइएको छ। दक्षिण एसियामै दुर्लभ मानिने यो अल्बिनो प्रजातिको भैंसीलाई अब विशेष संरक्षणका लागि ढाका राष्ट्रिय चिडियाखानामा स्थानान्तरण गरिएको छ। आफ्नो नाम र अनौठो स्वरूपकै कारण नाटकीय रूपमा ज्यान जोगाउन सफल यो भैंसी यतिबेला विश्वभर चर्चाको विषय बनेको छ।