इरान युद्धका कारण अमेरिकी सैन्य बजेटमा दबाब

 इरानविरुद्ध जारी सैन्य अभियानका कारण अमेरिकी रक्षा मन्त्रालय (पेन्टागन) आर्थिक दबाबमा परेको छ । नियमित तालिम र मर्मत कार्य सञ्चालन गर्नसमेत कठिनाइ हुन थालेपछि सैन्य नेतृत्वले अमेरिकी कंग्रेससँग थप बजेट माग गरेको छ ।

 अमेरिकी नौसेनाका प्रमुख डेरिल काउड्लले यो महिनाको सुरुवातमा हाउस आम्र्ड सर्भिसेज कमिटीसमक्ष बोल्दै सन २०२६ को बजेटमा ‘अपरेशन एपिक फ्युरी’ समावेश नगरिएको बताएका थिए ।  उनका अनुसार त्यसको असर नियमित सैन्य गतिविधिहरूमा परेको छ ।

प्रशिक्षण अभ्यास, उडान तालिमका घण्टा तथा नयाँ भर्ती सैनिकहरूको तालिमसमेत सीमित गर्नुपरेको उनले बताए । ‘मैले रेकर्ड स्तरको भर्ती गरेको भएपनि अतिरिक्त बजेट नपाए ती सैनिकलाई बुट क्याम्पबाट अघि बढाउन र भर्ती तथा पुनः भर्ती बोनस दिन कठिन हुनेछ,’ काउड्लले सांसदहरूलाई भने ।

यसैबीच, अमेरिकी सेनाको करिब ७० हजार सैनिक र सयौँ ट्यांकको नेतृत्व गर्ने III Armored Corps  ले आफ्नो प्रशिक्षण बजेट अप्रिलको अन्त्यमा झन्डै २९ करोड २० लाख डलरले घटाइएको आन्तरिक दस्ताबेजमा उल्लेख छ । पेन्टागनले यस विषयमा टिप्पणी गर्न अस्वीकार गरेको छ ।

पेन्टागनका कार्यवाहक वित्त प्रमुख जुल्स जे हस्र्ट तृतीयले मे १२ मा हाउस एप्रोप्रिएसन्स कमिटीसमक्ष युद्धको हालसम्मको लागत करिब २९ अर्ब डलर पुगेको बताएका थिए । यस अनुमानमा हतियार र नष्ट भएका विमानहरूको लागत मात्र समावेश गरिएको र सैन्य अड्डा पुनर्निर्माणको खर्च नसमेटिएको उनले स्वीकार गरेका थिए ।

सीएनएनका स्रोतहरूका अनुसार, युद्धको वास्तविक कुल खर्च ४० देखि ५० अर्ब डलरसम्म पुग्न सक्ने अनुमान गरिएको छ।