आन्तरिक कम्पनी विवादका कारण गेमिङ टाइकुनको हत्या गर्ने दोषीलाई मृत्युदण्ड

बेइजिङ । चिनियाँ अधिकारीहरूले एक व्यक्तिलाई प्रख्यात गेमिङ व्यापारी लिन क्विको हत्या गरेको अभियोगमा मृत्युदण्ड दिएको छ ।

मृत्युदण्ड पाउने व्यक्ति पूर्ववकिल सु याओ हुन्, जसलाई अदालतले २०२४ मा दोषी ठहर गरेको थियो । चीनको स्थानीय सञ्चारमाध्यमका अनुसार यो घटना २०२० मा भएको हो । सुले लिनलाई विष प्रयोग गरी हत्या गरेको आरोप लागेको थियो । उनीहरूबीच व्यापारिक विवाद बढेपछि यो घटना भएको बताइन्छ ।

लिन चीनको गेमिङ कम्पनी योजू गेम्सका संस्थापक थिए । उनले नेट्फ्लिक्ससँग सम्बन्धित ठुलो परियोजनामा कम्पनीलाई जोड्न महत्त्वपूर्ण भूमिका खेलेका थिए, जसमा पछि विश्वव्यापी रूपमा चर्चित सिरिज ‘थ्री बढी प्रब्लम’ बन्यो । अदालत विवरणअनुसार सुले लिनलाई प्रोबायोटिक चक्की भनेर विषालु पदार्थ खुवाएका थिए । त्यसपछि २०२० डिसेम्बरमा लिन बिरामी परे । विष खुवाएको यस घटनामा अन्य कैयौं बिरामी परेका थिए । अस्पतालमा उपचारका क्रममा नौ दिनपछि उनको मृत्यु भयो, त्यतिबेला उनी ३९ वर्षका थिए ।

सुलाई २०२० मा नै प्रहरीले पक्राउ गरेको थियो र २०२४ मा अदालतले उनलाई मृत्युदण्ड सुनाएको थियो । पछिल्लो रिपोर्टअनुसार उनको मृत्युदण्ड २१ मे मा कार्यान्वयन गरिएको हो । लिनको मृत्युले चीनको गेमिङ उद्योग मात्र होइन, अन्तर्राष्ट्रिय मनोरञ्जन क्षेत्रलाई पनि झस्काएको थियो । उनी प्रसिद्ध गेम अफ थ्रोन्स–थिममा आधारित गेम विकास गर्ने कम्पनीका प्रमुखमध्ये एक थिए ।

उनको कम्पनीले विश्वप्रसिद्ध विज्ञान–कथा शृंखला रिमेम्ब्रेन्स अफ अर्थस पास्टको फिल्म अधिकार राखेको थियो, जसलाई पछि नेटफ्लिक्सले टेलिभिजन श्रृंखलामा रूपान्तरण गर्‍यो । सुको मृत्युदण्ड पुष्टि भएपछि न्याय अन्ततः पूरा भयो भन्दै लिनको कम्पनीले प्रतिक्रिया दिएको छ । लिनको मृत्युले उद्योगलाई ठुलो क्षति पु‍र्‍याएको कम्पनीका सहकर्मीहरूले बताएका छन् ।