इरानले अमेरिकी ड्रोन खसालेको दाबी

तेहरान । इरानको इस्लामिक रिभोलुसनरी गार्ड कप्र्स (आईआरजीसी)ले आफ्नो हवाई क्षेत्रमा प्रवेश गरेको एक अमेरिकी ड्रोन खसालिएको दाबी गरेको छ । 

 उक्त ड्रोनलाई शत्रुको विमानका रूपमा पहिचान गरेर कारबाही गरिएको बताइएको छ । आईआरजीसीका अनुसार खसालिएको ड्रोन एमक्यू–९ रीपर हो । 

इरानी सेनाले यसलाई आफ्नो हवाई क्षेत्र उल्लङ्घनको स्पष्ट प्रमाण भन्दै वैध र निश्चित अधिकार प्रयोग गरेर प्रतिक्रिया दिएको दाबी गरेको छ ।

इरानले यो पनि भनेको छ कि अमेरिका वा कुनै अन्य पक्षले युद्धविरामको उल्लंघन गरेमा प्रतिक्रिया दिने अधिकार सुरक्षित राखिएको छ। यसले हालको तनावपूर्ण युद्धविराम झनै कमजोर अवस्थामा पुगेको संकेत गरेको छ ।

 हालसम्म अमेरिका पक्षले ड्रोन खसालिएको दाबीबारे औपचारिक प्रतिक्रिया दिएको छैन । यो घटनाअघि नै अमेरिकी सेनाले इरानका रकेट–लन्च साइटहरूमा रक्षात्मक कारबाही गरेको जनाएको थियो ।