श्रीमती महिनावारी हुँदा छोरीमाथि बलात्कार

 बुवाबाट बलात्कृत हुँदै आएकी दैलेखकी बालिकाको प्रहरीले उद्धार गरेको छ । बलात्कारको आरोपमा किशोरीका बुवालाई नियन्त्रणमा लिइएको हो ।

बालिका १ वर्षदेखि आफ्नै बुवाबाट बलात्कृत भइरहेको सूचनाका आधारमा इलाका प्रहरी कार्यालय नौमुलेबाट खटिएको प्रहरी निरीक्षक राजकुमार थापाको टोलीले किशोरीको उद्धार र बुवालाई नियन्त्रणमा लिएको छ ।

प्रहरीको प्रारम्भिक अनुसन्धानमा ती बालिका आफ्नै बुवाबाट बलात्कृत भएको खुलेपछि ४९ वर्षीय किशोरीका बुवालाई नियन्त्रणमा लिएर थप अनुसन्धान भइरहेको प्रहरीले जनाएको छ । आरोपी किशोरीका बुवाविरुद्ध हाडनातामा जबरजस्ती करणीको मुद्दामा अनुसन्धान भइरहेको जिल्ला प्रहरी प्रमुख गणेशबहादुर बरालले जानकारी दिए ।

पक्राउ परेका बुवाले आफ्नै छोरीलाई २०८२ साउनबाटै बलात्कार गरिरहेको प्रहरी अनुसन्धानमा खुलेको छ ।

पीडित बालिकाकी आमाले दिएको बयानअनुसार छोरीमाथि बलात्कार भइरहेको जानकारी पाए पनि श्रीमान्ले मार्ने धम्की दिएपछि घटनाबारे भन्न सकेको बताइएको छ । आर्थिक विपन्नताका कारण किशोरीकी आमाले दैनिक कमाउन जानुपर्ने र घरमा बुवाले दैनिक जाँडरक्सी खाएर आफू र छोराछोरीलाई कुटपिट गर्दै आएको आमाको बयान छ ।

बालिकालाई दैलेखस्थित सामाजिक संस्थाको संरक्षणमा राखेर उपचार भइरहेको प्रहरीले जनाएको छ ।

बुवाको बलात्कारको शिकार बनेकी किशोरीले बुवाको डरले घटनाबारे कतै भन्ने नसकेको बताएकी छिन् । गत साउन महिनादेखि नै छोरी बलात्कारमा परेको बालिकाकी आमाको बयान छ ।

‘म महिनावारी भएको बेला छाउगोठमा सुतेको थिएँ । छोरीहरू बुवासँग सुतेका थिए, त्यहीँबाट बुवाको कुकृत्य सुरु भएछ,’ किशोरीकी आमाको बयान छ । १२ वर्षीया छोरीमाथि बुवाले त्यस्तो गर्लान् भन्ने कल्पना पनि नगरेको उनले बताइन् ।