सर्वोच्चबाट आफैले पाएको परमादेशको वज्र गठबन्धनमाथि बजारियो, कार्की मुख्यमन्त्री बन्ने निश्चित

 काठमाडाैँ।कोसी प्रदेश सभाबाट पार्टीमा आफ्नो नियन्त्रण नै गुम्न थालेपछि नेपाली कांग्रेसका सभापति शेरबहादुर देउवा तनावमा छन्। योभन्दा बढी तनाव थपिएको छ प्रधानमन्त्री पुष्पकमल दाहाल प्रचण्डलाई ।

कोसीमा गठबन्धनका तर्फबाट माओवादी केन्द्रका इन्द्र आङ्बोलाई मुख्यमन्त्रीका लागि अघि सारेका बेला कांग्रेसकै शेखर कोइराला पक्षका केदार कार्कीले नेकपा एमालेसँग मिलेर सोही पदमा दाबी गरेपछि राजनीति नयाँ मोडमा पुगेको छ। यसले गठबन्धनमै फाटो ल्याउन सक्ने भय बढाएपछि उनले शुक्रबार दिनभर परिस्थिति आफ्नो पक्षमा पार्न प्रयास गरे।

शुक्रबार ५ बजेसम्म मुख्यमन्त्रीमा दाबी पेस गर्न समय दिएका प्रदेश प्रमुख परशुराम खापुङले कार्की र आङ्बोको पक्षमा हस्ताक्षर गरेका सांसदहरुलाई शनिबार दिउँसोसम्म उपस्थित भएर सनाखत गर्न समय दिएका छन्। रातभरिमा कुनै फेरबदल नभए कार्कीलाई मुख्यमन्त्री बन्नबाट देउवाले रोक्न सक्ने छैनन्। किनकि उनीसँग स्पष्ट बहुमत छ। कार्कीको पक्षमा खुलेका ४७ सांसद शुक्रबार पनि प्रदेश प्रमुखकहाँ पुगेका थिए। यति मात्र होइन, कार्कीको पक्षमा कांग्रेसका अरू सांसदहरू पनि खुल्दै गएका छन् ।

बिहीबार साँझ एकाएक बदलिएको कोसी राजनीतिले गठबन्धन दलका नेतालाई थेगिनसक्नु तनाव दिएको छ। राजनीतिक रूपमा गठबन्धन दुर्घटनामा परिसकेको छ। देउवा र दाहाल नैतिक संकटमा पनि फसिसकेका छन् ।

कार्कीबाहेक शेखर पक्षका जो नेतालाई अघि सारे पनि मुख्यमन्त्रीमा सहमति गर्ने प्रस्ताव गरे। कांग्रेस प्रचार विभाग प्रमुख मीन विश्वकर्माका अनुसार प्रधानमन्त्री प्रचण्डले कांग्रेसलाई एकजुट हुन सुझाव दिए।

यसले कोइराला पक्ष देउवा खेमासँग झन् चिढिएको छ । कोइरालाले पनि प्रधानमन्त्री दाहाल र सभापति देउवा दुवैको प्रस्तावलाई ठाडै अस्वीकार गरिदिए। शेखरको यस अडानले गठबन्धन जोगाउने कुनै जादु बाँकी छैन । गठबन्धनलाई निरन्तरता दिने कुरामा दाहाल र देउवा निरूपाय भइसकेका छन् । पार्टी विभाजन हुन नदिने र गठबन्धन पनि जोगाउने उपाय निकाल्ने भनेर चाहिँ देउवाले भन्न छाडेका छैनन् ।