यातायात व्यवस्था विभागले सवारी चालक अनुमतिपत्र लाइसेन्स छपाइसम्बन्धी नयाँ व्यवस्था

यातायात व्यवस्था विभागले सवारी चालक अनुमतिपत्र (लाइसेन्स) छपाइसम्बन्धी नयाँ व्यवस्था गरेको छ। अब म्याद सकिन १ वर्षभन्दा कम अवधि बाँकी रहेका लाइसेन्सहरू तत्काल छापिने छैनन्।

विभागका अनुसार यस्ता लाइसेन्स नवीकरण गरेपछि मात्र नयाँ कार्ड प्रिन्ट गरेर उपलब्ध गराइनेछ। तर कुनै सेवाग्राहीलाई तत्काल आवश्यकता परेमा भने निवेदनका आधारमा लाइसेन्स छापिने व्यवस्था गरिएको छ।

हाल लाइसेन्सको अवधि ५ वर्ष रहेकोमा नवीकरणपछि यसको अवधि १० वर्ष कायम हुनेछ। म्याद सकिन केही समय मात्र बाँकी रहेका लाइसेन्स अहिले नै छाप्दा केही समयमै पुनः नवीकरण गर्नुपर्ने भएकाले राज्यको खर्च बढ्ने र व्यवस्थापनमा पनि समस्या हुने विभागको भनाइ छ।

विभागका अनुसार हाल छाप्न बाँकी रहेका लाइसेन्समध्ये ठूलो संख्यामा प्रिन्ट प्रक्रिया अगाडि बढिसकेको छ। नयाँ व्यवस्थाले लाइसेन्स वितरण प्रणालीलाई थप व्यवस्थित बनाउने अपेक्षा गरिएको छ।