इप्पानको नेतृत्व चयन: वरिष्ठ उपाध्यक्षमा लामा र महासचिवमा आचार्य सर्वसम्मत

स्वतन्त्र ऊर्जा उत्पादकहरूको संस्था, नेपाल (इप्पान) को नयाँ कार्यसमिति चयन प्रक्रिया अन्तर्गत अधिकांश पदाधिकारीहरू सर्वसम्मत निर्वाचित भएका छन् । इप्पानको विधान अनुसार वर्तमान वरिष्ठ उपाध्यक्ष मोहनकुमार डाँगी स्वतः अध्यक्ष बनेका छन् भने वरिष्ठ उपाध्यक्ष पदमा उत्तम भ्लोन लामा निर्वाचित भएका छन् । अर्का उम्मेदवार बलराम खतिवडाले आफ्नो उम्मेदवारी फिर्ता लिएपछि लामा निर्विरोध निर्वाचित भएका हुन् ।

संस्थाको अन्य पदहरूमा पनि सहमतिको आधारमा नेतृत्व चयन गरिएको छ । जसअनुसार महासचिवमा टीएन आचार्य र उपमहासचिवमा कविता पोखरेल सर्वसम्मत रूपमा चुनिएका छन् । उपाध्यक्ष पदका लागि उत्तरकुमार श्रेष्ठ, सुसन कर्माचार्य, हिम पाठक, विक्रम विष्ट र नरेन्द्र बल्लभ पन्तबीच सहमति जुटेको छ, यद्यपि यसको औपचारिक घोषणा हुन भने बाँकी छ । विधान अनुसार हाल पाँच जना उपाध्यक्ष रहने व्यवस्था भए पनि विधान संशोधन मार्फत दुई जना थप गर्ने निर्णय गरिएको छ । उक्त संशोधित विधान जिल्ला प्रशासन कार्यालयबाट प्रमाणीकरण भएपछि कार्यान्वयनमा आउनेछ ।

त्यसैगरी, सचिव पदमा कुवेरमणि नेपाल, अभिज्ञा मल्ल, ईशा श्रेष्ठ, सुमन जोशी र विजयमोहन भट्टराई बिहीबार नै सर्वसम्मतिले निर्वाचित भइसकेका छन् । विधान संशोधनपश्चात् सचिव पदमा पनि दुई जना थप गरिने जानकारी दिइएको छ। कार्यसमितिका अन्य पदमा सहमति जुटे पनि कोषाध्यक्षमा भने निर्वाचन भइरहेको छ । कोषाध्यक्ष पदका लागि शंकर बस्याल र मिथुन पौडेल चुनावी प्रतिस्पर्धामा उत्रिएका छन् ।