एलन मस्क बने विश्वका पहिलो ट्रिलिनियर

काठमाडौं । प्रविधि उद्यमी एलन मस्क विश्वकै पहिलो ट्रिलिनियर अर्थात् कुल सम्पत्ति १० खर्ब डलरभन्दा बढी हुने व्यक्ति बनेका छन् । अन्तर्राष्ट्रिय समाचार एजेन्सीहरूका अनुसार बिहिबार रकेट कम्पनी स्पेसएक्सको प्राथमिक सार्वजनिक निष्कासन (आईपीओ) पछि यो उनी ट्रिलिनियर बनेका हुन् । यससँगै मस्कको कुल सम्पत्ति १.१ ट्रिलियन डलरभन्दा बढी पुगेको छ ।

मस्कको मुख्य सम्पत्ति स्पेसएक्स र टेस्लामा रहेको उनको सेयर हिस्सा हो । स्पेसएक्सले आईपीओमार्फत् सर्वाधिक ७५ अर्ब डलर संकलन गरेको थियो । रोयटर्सका अनुसार स्पेसएक्समा मात्रै मस्कको सेयरको रकम करिब ८६६ अर्ब डलर छ । अमेरिकी बजारमा २०२६ जुन १२ देखि कारोबार शुरु भएपछि उनको सम्पत्तिमा यो उछाल आएको हो ।

सीएनएनको समाचारअनुसार मस्कको यो सम्पत्ति विश्वका अन्य चार धनी व्यक्तिहरूको कुल सम्पत्तिभन्दा पनि बढी छ । दोस्रो स्थानमा रहेका ल्यारी पेजको सम्पत्ति मस्कको तुलनामा झण्डै एक तिहाइ मात्रै छ । अझै रोचक त, मस्कको सम्पत्ति ताइवान, स्विडेन र उनको जन्मथलो दक्षिण अफ्रिकाजस्ता धेरै देशको कुल अर्थतन्त्रभन्दा पनि ठूलो भएको छ । खासमा १ ट्रिलियनभन्दा बढी अर्थतन्त्र भएका देश नै जम्मा २३ वटा छन् ।

लगानीकर्ताहरूले मस्कप्रति ठूलो भरोसा देखाएको रोयटर्सले उल्लेख गरेको छ । बजार विश्लेषकहरूले यसलाई ‘इलन प्रिमियम’ वा ‘मस्कनोमी’ को संज्ञा दिएका छन् । ५४ वर्षीय मस्कले टेस्ला र स्पेसएक्स बाहेक न्युरालिंक र द बोरिङ कम्पनीजस्ता अन्य प्रविधि कम्पनीहरू पनि स्थापना गरेका छन् भने सामाजिक सञ्जाल प्लाटफर्म एक्स (ट्विटर) उनकै हो ।