केन्यामा विद्यालयमा आगलागी : १६ विद्यार्थीको मृत्यु, दर्जनौँ घाइते

नैरोबी । केन्याको राजधानी नैरोबीबाट करिब १२० किलोमिटर पश्चिममा रहेको गिलगिल क्षेत्रमा एक विद्यालयको  छात्रावासमा भएको आगलागीमा कम्तीमा १६ जना विद्यार्थीको मृत्यु भएको स्थानीय प्रहरीले जनाएको छ । घटनामा ७४ जना विद्यार्थी घाइते भएका छन् । 

उनीहरूको अस्पतालमा उपचार भइरहेको अधिकारीहरूले बताएका छन् । यो आगलागी गिलगिलस्थित उतुमिशी गर्ल्स स्कुलमा बिहीबार बिहान सबेरै भएको हो । अधिकांश विद्यार्थीहरू सुतिरहेको समयमा घटना भएको बताइएको छ ।

केन्या रेडक्रस र प्रहरीले दिएको जानकारीअनुसार आगो स्थानीय समयअनुसार राति करिब १ बजेतिर २२० जना विद्यार्थी बस्ने गरेको छात्रावास भवनमा फैलिएको थियो । आगलागीको कारण अहिलेसम्म स्पष्ट भएको छैन र अनुसन्धान जारी रहेको प्रहरीले जनाएको छ । आपतकालीन उद्धार टोलीहरू घटनास्थलमा परिचालन गरिएको छ ।

प्रहरीले विद्यालय क्षेत्रलाई घेराबन्दी गरेको छ र हाल केवल अभिभावकहरूलाई मात्र भित्र जान अनुमति दिइएको छ । केन्या रेडक्रसले प्रभावित विद्यार्थीहरूलाई सहयोग पुर्‍याउन राहत टोलीहरू परिचालन गरिएको जनाएको छ । आगलागीको समयमा केही विद्यार्थीहरूले झ्यालबाट हाम फालेर ज्यान जोगाउने प्रयास गरेको अनि यस क्रममा उनीहरू घाइते भएको प्रत्यक्षदर्शीले बताएका छन् ।