अमेरिका र इरानबीच केही मुद्दामा सहमति जुटेको समाचार आए

अमेरिका र इरानबीच केही मुद्दामा सहमति जुटेको समाचार आएका छन् ।

बीबीसी फारसी सेवाका अनुसार इरानी विदेश मन्त्रालयका प्रवक्ता इस्माइल बगाईले अमेरिकासँग केही मुद्दामा सहमति जुटेको बताएका छन् ।

उनले यसको अर्थ तत्काल कुनै सम्झौतामा हस्ताक्षर हुने सम्भावनाबारे पनि प्रस्ट खुलाएका छैनन् ।

यसअघि आइतबार इरानी सरकारी सञ्चारमाध्यमले अमेरिका–इरानबीच एकदेखि दुई मुद्दामा मात्रै मतभेद बाँकी रहेको समाचार सार्वजनिक गरेको थियो ।

इरानी विदेश मन्त्रालयका प्रवक्ता बगाईले सहमतिको ढिलाइ हुनुको कारण अमेरिकी अधिकारीहरूको विरोधाभाषपूर्ण धारणा र वार्ताकै बीच हमला गर्ने अमेरिकी इतिहास रहेको टिप्पणी गरेका छन् ।

यसअघि सोमबार भारत भ्रमणमा रहेका अमेरिकी विदेशमन्त्री मार्को रुबियोले इरानसँग आज सोमबार युद्ध समाप्त हुनेगरी सम्झौता हुने सम्भावना औंल्याएका थिए ।

नयाँ दिल्लीमा पत्रकारसँग कुराकानी गर्दै विदेशमन्त्री रुबियोले भनेका थिए,‘हामी अहिले पनि त्यही काम गरिरहेका छौं । जस्तो मैले पहिलो भनेको थिएँ । हामीलाई लागेको थियो, सायद हिजो राति केही खबर आउँछ । तर अब आज आउँला ।’

उनले अमेरिकासँग बलियो प्रस्ताव आएको पनि दाबी गरेका थिए । जसमा स्ट्रेट अफ होर्मुज खोल्ने र निर्धारित समयमा परमाणुका विषयमा वार्ता सुरु गर्ने विषय पनि सामेल रहेको उनले बताएका थिए ।