अमेरिका–इरान शान्ति वार्ताबारे ट्रम्पले भने– पुनः युद्ध हुने सम्भावना ५०/५० प्रतिशत

काठमाडौं । अमेरिकी राष्ट्रपति डोनाल्ड ट्रम्पले इरानसँग सम्झौता वा पुनः युद्ध सुरु हुने सम्भावना ५०/५० प्रतिशत रहेको बताएका छन् । अमेरिकी मिडिया आउटलेट एक्सियोसलाई दिएको अन्तर्वार्तामा उनले इरानविरुद्ध सैन्य कारबाही पुनः सुरु गर्ने/नगर्ने विषयमा आफूले आइतबारसम्म निर्णय लिने बताएका हुन् ।

ट्रम्पका अनुसार, उनले आफ्ना वार्ताकारबाट इरानको नयाँ प्रस्तावको समीक्षा गराएपछि मात्र अन्तिम निर्णय लिनेछन् । उनले भने, “दुईमध्ये एउटा कुरा हुनेछ । या त हामी उनीहरूमाथि पहिलेभन्दा अझ ठूलो आक्रमण गर्नेछौँ वा एउटा राम्रो सम्झौतामा हस्ताक्षर हुनेछ ।”

ट्रम्पले इरानबारे आफ्नो नीति पूर्ण रूपमा स्पष्ट रहेको पनि बताएका छन् । वार्ता सफल नभए अमेरिकाले कडा सैन्य कदम चाल्न सक्ने उनको भनाइ छ ।

ट्रम्पले इजरायली प्रधानमन्त्री बेन्जामिन नेतान्याहू कुनै कमजोर वा खराब सम्झौताबारे चिन्तित रहेको भन्ने दाबीलाई पनि अस्वीकार गरे । उनले नेतान्याहू चिन्तित नरहेका भन्दै सम्भावित सम्झौताप्रति इजरायलको दृष्टिकोण सकारात्मक रहेको संकेत गरे ।

यसैबीच, अमेरिका र इरान होर्मुज जलमार्ग पुनः खुला गर्न तयार भएका जनाइएको छ । फाइनान्सियल टाइम्सका अनुसार, दुवै देशले सबैभन्दा पहिले युद्धविरामलाई थप ६० दिनका निम्ति विस्तार गर्ने सम्भावनामा सहमति जुटाउने प्रयास गरिरहेका छन् ।

होर्मुजलाई विश्वकै सबैभन्दा महत्त्वपूर्ण तेल व्यापारिक मार्गमध्ये एक मानिन्छ । होर्मुज पुनः सामान्य रूपमा सञ्चालनमा रहे अन्तर्राष्ट्रिय ऊर्जा बजारलाई उल्लेखनीय राहत दिन सक्छ ।