युक्रेनको राजधानी किभमा रुसले गर्‍यो ठूलो आक्रमण

काठमाडौं । रुसले आइतबार बिहान युक्रेनको राजधानी किभमा ठूलो आक्रमण गरेको छ ।

रुसी नियन्त्रणमा रहेको पूर्वी युक्रेनमा भएको आक्रमणको बदला लिने चेतावनीपछि किभमा रुसले ठूलो ब्यालिस्टिक मिसाइल आक्रमण भएको हो । युक्रेनी अधिकारीहरूका अनुसार उक्त आक्रमणमा परी कम्तीमा पाँचजना घाइते भएका सीबीएस न्युजले जनाएको छ ।

विस्फोटका कारण सरकारी आवासीय भवन थर्किएको थियो भने दर्जनौँ मानिसहरूले सहरको केन्द्रमा रहेको भूमिगत मेट्रो स्टेशनमा शरण लिएका थिए । किभका सैन्य प्रशासनका प्रमुख तिमुर तकाचेन्कोले टेलिग्राममा राजधानीमा ठूलो मात्रामा ब्यालिस्टिक मिसाइल आक्रमण भएको जनाएका छन् ।

किभका मेयर भिटाली क्लित्स्कोले पाँचजना घाइते भएको र तीमध्ये एकजनालाई अस्पताल भर्ना गरिएको जानकारी दिए । उनले ड्रोन आक्रमण अझै जारी रहेको र ब्यालिस्टिक मिसाइलको खतरा कायम रहेको भन्दै नागरिकहरूलाई सुरक्षित आश्रयस्थलमै बस्न आग्रह गरेका छन् ।

यसअघि रुसले आफ्नो नियन्त्रणमा रहेको पूर्वी युक्रेनमा भएको घातक आक्रमणका जिम्मेवारहरूलाई सजाय दिने चेतावनी दिएको थियो । त्यसपछि युक्रेनी अधिकारीहरू तथा किभस्थित अमेरिकी दूतावासले राजधानीमा ठूलो आक्रमण हुन सक्ने चेतावनी जारी गरेका थिए ।

मेयर क्लित्स्कोका अनुसार किभको उत्तर–पश्चिममा रहेको पोडिल्स्की जिल्लाको एक गैर–आवासीय क्षेत्रमा मिसाइलका भग्नावशेष खसेपछि त्यहाँ मेडिकल टोली परिचालन गरिएको थियो । उनले नजिकैको शेभचेन्किभ्स्की जिल्लामा पनि एउटा आवासीय भवन नजिक आक्रमणका कारण आगलागी भएको जानकारी दिएका छन् ।

युक्रेनी सेनाले रुस नियन्त्रित पूर्वी क्षेत्रमा ठूलो संख्यामा ड्रोन आक्रमण गरेपछि किभले आफूविरुद्ध व्यापक रुसी मिसाइल आक्रमण हुन सक्ने आशंका पहिले नै व्यक्त गरेको थियो ।

रुसका अनुसार उक्त युक्रेनी ड्रोन आक्रमणले एउटा कलेजको छात्रावासमा प्रहार गर्दा कम्तीमा १८ जनाको मृत्यु भएको थियो ।

बिहीबारदेखि शुक्रबार रातिसम्म गरिएको उक्त ड्रोन आक्रमण पछिल्ला केही महिनायताकै सबैभन्दा घातक युक्रेनी आक्रमणहरूमध्ये एक मानिएको छ ।

यस आक्रमणले रुस नियन्त्रित लुहान्स्क क्षेत्रको स्टारोबिल्स्कमा ४२ जनालाई घाइते भएका थिए भने धेरै मानिसहरू भग्नावशेषभित्रै थुनिएका थिए ।

युक्रेनले भने नागरिकहरूलाई लक्षित गरिएको आरोप अस्वीकार गर्दै आफूहरूले स्टारोबिल्स्क क्षेत्रमा तैनाथ रुसी ड्रोन युनिटमाथि आक्रमण गरेको दाबी गरेको छ ।