अख्तियारले कुलमान घिसिङलाई अकुत सम्पत्तिमा छानबिन गर्ने निर्देश

कुलमान र उहाँको परिवारका सदस्यविरुद्ध धेरै उजुरी परेकाले छानबिन थालेको जानकारी दिँदै अख्तियार स्रोतले वर्णन मिडियासँग भन्यो– ‘उजुरी आएकाले गम्भीरतापूर्वक छानबिन हुन्छ, अकुत सम्पति आर्जन गरेको देखिए सोहीअनुसार कारबाही हुन्छ।’

स्रोतका अनुसार उजुरीमा कुलमान घिसिङ पहिलोपटक नेपाल विद्युत् प्राधिकरणको कार्यकारी निर्देशक नियुक्त भएपछि अपारदर्शी रूपमा आएको पैसा प्रयोग गरेर आफ्नो भाइ गणेश घिसिङको नाममा ३ करोडको कम्पनी दर्ता गराई प्राधिकरणको आवरणमा सोही कम्पनीबाट एक अर्बभन्दा बढीको कारोबार गरेको दाबी गरिएको छ।

अख्तियारमा परेको उजुरीमा कुलमानले आफ्नो पदीय हैसियत दुरुपयोग गरेर अकुत सम्पति आर्जन गरेको र सो सम्पत्ति आफ्नो परिवारका सदस्यको नाममा व्यापार व्यवसायमा लगानी गरेको दाबी गरिएको छ।

कुलमानका भाइहरूको नाममा रहेको सो कम्पनीले १७ वटा बैंकमा गरेर १ अर्बभन्दा माथिको कारोबार गरेको भन्दै उजुरीमा कुनै आयस्रोत नभएका बिहान बेलुका खाना खानसमेत समस्या रहेको परिवारको हैसियत कुलमान प्राधिकरणको प्रबन्ध निर्देशक हुनासाथ ३ करोडको लगानी रहेको कम्पनी दर्ता गर्न सक्ने भएको जिकिर गर्दै उजुरीमा कुलमानले प्राधिकरणको आवरणमा कमाएको अवैध आम्दानीको प्रयोग भएको दाबी गर्दै यस विषयमा गम्भीर छानबिन गरी सत्यतथ्य पत्ता लगाउन अख्तियारसमक्ष माग गरिएको छ ।

कुलमान २०७३ सालमा प्राधिकरणको प्रबन्ध निर्देशकमा नियुक्त हुनुभएको थियो भने उहाँले आफ्नो भाइहरूको नाममा २०७४ सालमा तेन्डेल हार्डवेयर नामक कम्पनी दर्ता गराउनु भएको थियो।

यसै गरी इक्रा नेपालले २०१२ सालमा करिब ४ अर्ब ४७ करोड रुपियाँ बराबरको कम्पनी लामा कन्स्ट्रक्सन प्रा.लि.को तत्कालीन मूल्यअनुसार ५५ करोड ८७ लाखको ९ लाख ६० हजार कित्ता अर्थात् १२.५ प्रतिशत सेयर खरिद गर्दा जम्मा ९ करोड ६० लाख मात्र देखाएर करछलीसमेत गरेको र सो रकमसमेत कुलमानले अवैध तरिकाले कमाएको रकम भएको भन्दै छानबिन गर्नुपर्ने समेत उजुरीमा माग गरिएको बताइएको छ।