टिकटकमा कडाइ नगर्जे इन्टरनेट सेवा प्रदायकलाई कारबाही गर्ने चेतावनी:नेपाल दूरसञ्चार

काठमाडौँ । नेपाल दूरसञ्चार प्राधिकरणले टिकटकमा कडाइ नगर्जे इन्टरनेट सेवा प्रदायकलाई कारबाही गर्ने चेतावनी दिएको छ ।

एक सूचना जारी गर्दै प्राधिकरणले सामाजिक सञ्जालको रूपमा प्रयोग भइरहेको टिकटकका माध्यमबाट सामाजिक सद्भाव एवम् सामाजिक वातावरणमा नकारात्मक असर परिरहेकोले नेपालमा यसको प्रयोगमा रोक लगाएकोले हुबहु पालना गर्न प्रदायकलाई निर्देशन दिएको हो । 

'नेपाल सरकारको निर्णय कार्यान्वयनको लागि दूरसञ्चार ऐन, २०५३ को दफा १५ ले दिएको अधिकार प्रयोग गरी सबै इन्टरनेट सेवा प्रदायकहरू र मोबाइल सेवा प्रदायकहरूलाई प्राधिकरणबाट निर्देशन जारी भएकोमा केही सेवा प्रदायक कम्पनीहरूको नेटवर्कबाट टिकटक प्रयोगकर्ताको पहुँच पुगिरहेको तथा टिकटक चलिरहेको पाइएकोले त्यस्ता सेवा प्रदायकहरूलाई प्राधिकरणबाट स्पष्टीकरण सोधिएको र दूरसञ्चार ऐन, २०५३ बमोजिम कारबाही प्रक्रिया अघि बढिसकेको हुँदा इन्टरनेट सेवा प्रदान गर्ने अन्य सेवा प्रदायक कम्पनीहरूलाई समेत प्राधिकरणको निर्देशन पालना गर्न र निर्देशन पालना नगरेको पाइएमा दूरसञ्चार ऐन, २०५३ बमोजिम कारबाही हुने ब्यहोरा यसै सूचना मार्फत जानकारी गराइएको छ'  प्राधिकरणले भनेको छ । 

साथै टिकटकमा पहुँच पुगिरहेको तथा टिकटक चलिरहेको भए प्राधिकरणको इमेल ठेगानामा इमेल गरी त्यस्तो इन्टरनेट कम्पनीको बारेमा जानकारी गराउनुहुन समेत सबै इन्टरनेट सेवाग्राहीहरूलाई प्राधिकरणले आग्रह गरेको छ ।