प्रदेश नं १ पुनः नामांकन: संयुक्त संघर्ष समिति र प्रदेश सरकारबीच आज वार्ता हुदैँ

काठमाडौँ। कोशी प्रदेश सरकार र पहिचान पक्षधरबीच आज वार्ता हुने भएको छ ।सरकारले प्रदेशको नाम कोशी राखेपछि पहिचानको आधारमा प्रदेशको नाम परिवर्तन गर्न माग गर्दै आन्दोलनरत प्रदेश नं १ पुनः नामांकन संयुक्त संघर्ष समिति र प्रदेश सरकारबीच आज बिहान विग होटलमा वार्ता हुन लागेको हो ।

वार्ता समिति सदस्य एवम् उद्योग कृषि तथा सहकारी मन्त्री भक्तिप्रसाद सिटौलाले आज बिहान पहिचान पक्षधरसँग औपचारिक वार्ता गर्न लागिएको जानकारी दिए ।

माओवादी केन्द्र र जसपाले सरकार छाडेपछि अल्पमतमा परेका मुख्यमन्त्री हिक्मतकुमार कार्कीले पहिचान पक्षधरसँग वार्ताका लागि मन्त्री तिलकुमार मेयाङ्बोको संयोजकत्वमा वार्ता समिति गठन गरेका थिए । वार्ता समितिमा उद्योग कृषि तथा सहकारी मन्त्री सिटौला र सामाजिक विकास मन्त्री बुद्धिकुमार राजभण्डारी सदस्य छन् ।

सरकारले वार्ताको आह्वान गरेपछि आइतबार पहिचान पक्षधरले पनि वार्ता समिति बनाएको थियो । वार्ता समिति सदस्यमा गोबिन्द आङ्बुङ, युवराज राई, रामभक्त कुरुम्बाङ, लाक्पा शेर्पा, गेल्जे शेर्पा, कुमार लिङ्देन, रमेश राई, कृष्ण चोङ्बाङ, प्रेम मिभक र पदम जवेगु छन् । उनीहरु विभिन्न पार्टी र जातीय संघ संस्थाका प्रतिनिधि हुन् ।

गत फागुन १७ गते प्रदेशसभाले प्रदेश नं। १ को नाम कोशी राखेपछि पहिचान पक्षधर नाम परिवर्तनको मागसहित चरणबद्ध रुपमा आन्दोलनमा छन् ।