बैंकक बम विस्फोटको घटनामा दुई जनालाई मृत्युदण्ड

काठमाडौँ । थाइल्याण्डको एक अदालतले सन २०१५ मा राजधानी बैंककको प्रसिद्ध धार्मिक स्थल नजिक भएको बम विस्फोटको घटनामा दुई पुरुषलाई दोषी ठहर गर्दै मृत्युदण्डको सजाय सुनाएको छ ।

यो घटना थाइल्याण्डको इतिहासकै सबैभन्दा घातक आतङ्कवादी हमला मानिन्छ । २०१५ को अगस्ट १५ मा बैंककको केन्द्रमा रहेको इरेवान मन्दिरनजिक शक्तिशाली बम विस्फोट भएको थियो ।

उक्त स्थान विदेशी पर्यटकहरूबिच अत्यन्त लोकप्रिय धार्मिक स्थल हो । विस्फोटमा २० जनाको मृत्यु भएको थियो भने १२० भन्दा बढी घाइते भएका थिए ।

अदालतले चिनियाँ उइगुर समुदायका दुई पुरुषलाई उक्त हमलाको योजना बनाउने र विस्फोट गराउने जिम्मेवार ठहर गरेको छ । तर दुवैले आरोप अस्वीकार गर्दै आफूहरू निर्दोष भएको दाबी गरेका थिए । 

घटनाको अनुसन्धान र दशक लामो अदालत प्रक्रियामाथि विभिन्न प्रश्न उठेका छन् । प्रारम्भिक अनुसन्धानमा सुरक्षा कमजोरीहरू देखिएको बताइएको छ । घटनास्थलका धेरै सिसिटिभी क्यामेरा काम नगरेको पाइएपछि अनुसन्धान प्रभावित भएको थियो ।

सरकारले पर्यटनमा असर नपरोस् भनेर घटनास्थल छिट्टै सफा गर्न आदेश दिएको थियो, जसले प्रमाण सङ्कलनमा असर पारेको आलोचकहरूको भनाइ छ । 

विस्फोटपछि उद्धारकर्ताहरूले घाइतेहरूको उपचार र मृतकको पहिचानमा काम गरेका थिए । प्रत्यक्षदर्शीहरूका अनुसार घटनास्थल अत्यन्त भयावह र अस्तव्यस्त थियो। सुरुवाती चरणमा प्रहरीले घटनालाई आतङ्कवादी आक्रमण नभएको दाबी गरेको थियो।

तर पछि विभिन्न भिडियो र प्रमाणका आधारमा अनुसन्धान अघि बढाइएको थियो । त्यसको केही हप्तामै दुई जनालाई पक्राउ गरिएको थियो, जसलाई अहिले अदालतले दोषी ठहर गरेको हो।