गृहले सच्यायो एसएसपी सरुवा, उपत्यका ट्राफिकमा काफ्ले

काठमाडौँ । गृह मन्त्रालयले प्रहरीका एसएसपीको सरुवा सच्याएको छ । जेठ १८ मा प्रधानमन्त्री एवम् गृहमन्त्री बालेन्द्र शाहले गरेको निर्णय अनुसार प्रकाशित सरुवा सूची मन्त्रालयले सच्याएको हो ।

काठमाडौँ उपत्यका ट्राफिक कार्यालयमा सरुवा भएका शान्तिराज कोइरालालाई त्यहाँबाट अन्यत्र काज सरुवा गरिएको छ । उपत्यका ट्राफिकमा सुरेश काफ्लेलाई ल्याउने निर्णय गरिएको छ ।

काफ्ले विशेष ब्युरोमा कार्यरत थिए । नेपाल प्रहरी प्रदेश कार्यालय वीरगन्जबाट उपत्यका ट्राफिकमा सरुवा भएका कोइरालाको सरुवा करेक्सन गरेर उनलाई विशेष ब्युरोमा पठाउने निर्णय गरिएको छ ।

प्रधानमन्त्री एवं गृहमन्त्री स्तरीय निर्णयबाट ३३ जनाको सरुवा गर्दा  कोइरालालाई इन्चार्जबाट इन्चार्जको जिम्मेवारी दिइएको भन्दै आलोचना भएको थियो । प्रहरी प्रधान कार्यालयको आन्तरिक मापदण्ड अनुसार प्रदेश कार्यालय वीरगन्ज ‘ख’ श्रेणीमा पर्छ । उपत्यका ट्राफिक प्रहरी कार्यालय ‘क’ श्रेणीको कार्यालय हो । 

मापदण्डमा एउटा कार्यालयको इन्चार्ज चलाएपछि अर्को इन्चार्जमा पठाउनुअघि एक वर्ष अन्यत्र काम गर्नुपर्ने व्यवस्था छ । त्यसबेला आईजीपी दानबहादुर कार्कीले सो मापदण्ड मिचेर कोइरालालाई उपत्यका ट्राफिकमा ल्याउन गृह मन्त्रालयमा सिफारिस गरेका थिए ।