तीजको दिन सर्वाेच्चमा दुईसयबढी थुनुवाका मुद्दाको पेशी

काठमाण्डौं, २१ भदौ :सर्वाेच्च अदालतमा सधै कौतुहलपूर्ण तवरले मुद्दाहरुको सुनुवाई हुने गरेकै परिप्रेक्ष्यमा आज तीजको दिन दुईसय बढी थुनुवाका मुद्दा पेशीमा चढेका छन् ।

आधाजसो न्यायाधीश, कर्मचारी र वकिल महिला रहेकोले आधा जनशक्ति उपस्थितिको दिन दुईसय थुनुवाका मुद्दाको सुनुवाईलाई पनि कौतुहलपूर्ण नै मान्नुपर्छ ।

प्रधानन्यायाधीश सहितका ५ जना न्यायाधीशको पद खाली रहेको, र आधा नै जनशक्ति विदामा बसेको दिन यसप्रकारले महत्वपूर्ण मुद्दाको सुनुवाई के होला भन्ने विषय भने पर्खाइकै विषय बनेको छ। 

आज तोकिएका मुद्दाहरुमा २०७६ देखि २०८० साल सम्ममा दर्ता भएका मुद्दाहरु रहेको छन् ।  खासगरी थुनुवाका मुद्दाहरुले प्राथमिकता पाउने भएकाले थुनामा बसेका मुद्दाहरुले सकेसम्म ५ बर्षे अभियान फांटमा पुग्नु नपर्ने अवस्था भएतापनि न्यायाधीशहरुको संख्या कम भएको, कार्यविधिगत प्रक्रिया लगायतका झन्झट एवं प्रमाण मुकरर गर्ने प्रक्रियाका कारणले थुनुवाकै मुद्दाहरुले समेत लामो समय कुर्नुपर्ने अवस्था आइपरेको कानुनविद्हरु बताउंछन् ।

थुनाका मुद्दाले पहिलो प्राथमिकता पाउने गरेका छन् भने हत्या, जबजस्ती करणी, मानव वेचबिखन जस्ता गम्भीर प्रकृतिका मुद्दा जिल्ला अदालतदेखि नै सर्वाेच्च अदालतसम्म आइपुग्दा कम्तिमा पनि एक दशकको अवधि पार गर्नु गरेको पनि पाइन्छ ।

सर्वाेच्च अदालतमा न्यायाधीशका चार पद खाली हुंदा मुद्दा सुनुवाई प्रभावित भएतापनि न्यायिक नेतृत्वले राजनीतिक खिचातानीका कारण न्यायाधीशको समयमै नियुक्ति गर्न भने सकेको छैन ।
न्यायपरिषद् ऐन, २०७३ को दफा ४ ले सर्वाेच्च अदालतको न्यायाधीश पद खाली हुने एकमहिनाअघि नै सिफारिस गर्नुपर्ने भएतापनि त्यसको पालना हुन नसकेपछि सर्वाेच्च अदालतकै इजलासले न्यायिक नेतृत्व र न्यायपरिषद्लाई समेत आदेश दिइसकेको छ ।

प्रधानन्यायाधीश विश्वम्भर प्रसाद श्रेष्ठले अवकाशपूर्वको बिदा आजैदेखि बस्ने अवस्थाले झनै न्यायाधीश नियुक्तिमा संसयपूर्ण अवस्था सुरु भइसकेको छ ।