ग्यास बुलेटको ठक्करबाट एक महिलाको मृत्यु: स्थानीयले गरे सडक अवरुद्ध

पृथ्वी राजमार्गको फिस्लिङमा भएको सवारी दुर्घटनामा एक महिलाको मृत्यु भएको छ । नारायणगढबाट काठमाडौं आउँदै गरेको ग्यास बुलेटले पैदलयात्री महिलालाई ठक्कर दिएको बताइन्छ । ठक्करबाट महिलाको घटनास्थलमै मृत्यु भएको जिल्ला प्रहरी कार्यालय चितवनले जनाएको छ ।

सोमबार दिउँसो १ बजेतिरको समयमा उक्त स्थानमा एन एल ०१ ए ०२८० नम्बरको भारतीय ग्यास बुलेटको ठक्करबाट अनुमानित ५०/५५ बर्ष उमेरको महिलाको घटनास्थलमै मृत्यु भएको चितवन प्रहरी प्रवक्ता डिएसपी भेषराज रिजालले जानकारी दिए। उनका अनुसार मृतकको नाम, थर, र वतन हालसम्म खुल्न सकेको छैन। 

घटना पछि स्थानीयहरू ठूलो संख्यामा भेला भई शव उठाउन नदिएपछि राजमार्ग दुबैतर्फ अवरुद्ध भएको छ। स्थानियहरूसँग समन्वय गरी स्थिति सामान्य बनाउने प्रयास भइरहेको प्रहरीको भनाइ छ।