आगलागी हुँदा करिब ८५ लाख रूपैयाँ बराबरको धनमाल नष्ट

 पाँचथर फिदिम नगरपालिका-२ साम्दिन बस्ने ६२ वर्षीय जय प्रकाश राईको घरमा मंगलबार दिउँसो आगलागी हुँदा घर र घरमा रहेको किराना पसल समेत पूर्णरूपमा जलेर करिब ८५ लाख रूपैयाँ बराबरको धनमाल नष्ट भएको छ ।

साथै उक्त आगलागी फैलिएर छिमेकी विजय नेम्वाङको घरको बार्दली र धुरी समेत गरी करिब १ लाख रूपैयाँ बराबरको धनमाल क्षति भएको छ । आगलागीमा जलेर घाइते भएका जय प्रकाशलाई जिल्ला अस्पताल हुँदै थप उपचारको लागि झापातर्फ रिफर गरिएको छ ।

मोरङ बुढिगंगा गाउँपालिका-२ मुस्लिम टोलमा पार्किङ गरी राखेको प्रदेश १-०२-००१ ज ३९४१ नम्बरको म्याजिक भ्यानमा मंगलबार राति आगलागी हुँदा म्याजिक भ्यान पूर्णरूपमा जलेर क्षति भएको छ ।

उदयपुर कटारी नगरपालिका-९ सुङगुरे बस्ने खम्ब सिंह थापा मगरको घरमा विद्युत सर्ट भई मंगलबार राति आगलागी हुँदा घर पूर्णरूपमा जलेर करिब ६ लाख रूपैयाँ बराबरको धनमाल नष्ट भएको छ ।