बलिउड अभिनेत्री उर्वशी रौटेला नेपाल आउने

 बलिउडकी चर्चित अभिनेत्री उर्वशी रौटेला नेपाल आउने भएकी छन् । होटल याक एन्ड यतिमा आगामी १४ डिसेम्बरमा आयोजना हुने फेसन शो हेल्दी च्वाइस ‘ग्ल्याम नेपाल इन्टरनेशनल २०२४’ मा शो टपरको रूपमा सहभागी हुन रौटेला नेपाल आउने भएकी हुन् ।

तीन सिजन भव्य रूपमा सम्पन्न भैसकेको ‘ग्ल्याम नेपाल इन्टरनेशनल’ को यो चौथो सिजन हो । ट्रयु स्किन एन्ड हेल्दी च्वाइस मुख्य प्रायोजक रहेको फेसन शोमा सहभागीका लागि मोडलको आवेदन खुल्ला गरिएको छ ।

आयोजक प्रारम्भ प्रोडक्सनले बुधवार एक विज्ञप्ति जारी गर्दै मोडलका लागि आवेदन खुल्ला भएको जानकारी दिएको हो ।  शोमा सहभागी हुन चाह मोडलले इसेवा एप मार्फत आवेदन फर्म भर्न सक्नेछन् ।

शोमा सहभागी मोडलहरूमा फिमेलका लागि ५.४ फिट र मेलका लागि ५.१० फिट हाइट माथि हुनुपर्ने प्रावधान छ । शो का लागि मोडल छनौट अडिसन ९ नोभेम्बरमा होटल हिमालयनमा आयोजना हुनेछ ।

जसबाट ६ मेल र २४ फिमेल गरेर ३० मोडल छानिने आयोजक प्रारम्भ प्रोडक्सनका फाउन्डर निर्देशक पवन आचार्यले जानकारी दिए ।

नेपालका उत्कृष्ट डिजाइनरहरूले तयार पारेको आकर्षक र नयाँ फेसनका डिजाइनहरू फेसन शोमा विभिन्न सिक्वेलमा प्रस्तुत हुनेछ । फेसन नयाँ र आकर्षक पहिरनको बारेमा फेसन प्रेमीलाई जानकारी दिने र फेसन डिजाइनरलाई प्रोत्साहन गर्ने उद्देश्यले फेसन शो आयोजना गर्न लागिएको हो ।

फेसन शोमा व्यवसायी, कलाकार, मोडल लगायतका विभिन्न व्यक्तिहरूको सहभागिता रहनेछ ।  शो को उत्कृष्ट मोडल तथा डिजाइनरले अस्ट्रेलियामा हुने ग्ल्याम इन्टरनेशनलमा सहभागीको अवसर प्राप्त गर्नेछन् ।