प्रहरीकै मिलेमतोमा हनीट्र्याप, अख्तियारका एसपीको जिम्मेवारी खोसियो

युवती प्रयोग गरेर बलात्कार मुद्दामा फसाउन खोजेको आरोपमा अहिले एक सहायक हवल्दारसहित चारजना ललितपुर प्रहरीको हिरासतमा छन् । 

गत असोज ९ गते पक्राउ परेका प्रहरी प्रभाग भैँसेपाटीका सहायक हवल्दार महेन्द्र हमाल, सुनसरी इटहरिकी सुष्मा विक, ताज स्लाम र भीमादेवी थापामाथि जिल्ला प्रहरी परिसर ललितपुरले आपराधिक लाभ र संगठित अपराध मुद्दामा अनुसन्धान गरिरहेको छ ।

पक्राउ परेकामध्ये हमालमाथि युवतीको प्रयोग गरेर व्यवसायीबाट असुल गरिएको रकम दुईपटक गरी आफैंले बैंकमा जम्मा गरेको आरोप छ । 

त्यस्तै, हनीट्र्यापमा प्रयोग भएकी युवती हुन्, सुष्मा विक । विकको सहयोगी हुन्, ताज स्लाम । स्लाम र विककै योजनामा व्यवसायीलाई बलात्कार मुद्दामा फसाउने भन्दै रकम डिल गरेको आरोप छ । व्यवसायीबाट यो गिरोहले ३० लाख रुपैयाँ असुल गरेको प्रहरी अनुसन्धानबाट खुलेको छ । 

 

असुल गरिएको रकम भने भीमादेवीको खातामा जम्मा गरिएको पाइएको छ ।

घटनाबारे सबै जानकार हुँदाहुँदै पनि मोटो रकम पाउने आश्वासनमा ललितपुर भैँसेपाटी प्रभागकी इन्सपेक्टर विनु शाहीले पीडकलाई साथ दिएको पाइएपछि उनलाई जिम्मेवारीबाट हटाइएको थियो ।

उनीमाथि प्रहरीको अनुरोधमा ललितपुर जिल्ला अदालतले पक्राउ पूर्जी जारी गरिसकेको छ । शाहीसँगै हनीट्र्यापमा संलग्न भएको आरोपमा इटहरिका दर्शन पोखरेल पनि फरार छन् । 

ललितपुर प्रहरीका प्रमुख एसएसपी शेखर खनालले फरार इन्सपेक्टर शाहीको खोजी कार्य भइरहेको बताए । उनले भने, ‘पक्राउ परेकामाथि आपराधिक लाभ र संगठित अपराधमा अनुसन्धान भइरहेको छ । शाहीको खोजी भइरहेको छ ।’ 

व्यवसायी कसरी परे हनीट्र्यापमा ?

ललितपुर प्रहरीका अनुसार हिरासतमा रहेकी सुष्मा सुनसरीकै एक होटलमा वेटरको रूपमा काम गर्दै आएकी थिइन् । होटलमा आउजाउका क्रममा एक व्यवसायीसँग उनको चिनजान भयो । दुवैजना नजिकिए । 

व्यवसायीसँग सुष्माको सम्बन्धबारे थाहा पाएपछि ताज र दर्शनले सुष्मालाई प्रयोग गरेर रकम असुल्ने योजना बनाए । व्यवसायीविरुद्ध बलात्कार मुद्दा हाल्ने भन्दै सुष्मासँग छलफल गरे । सुष्माले योजनाअनुसार व्यवासायीलाई आफ्नो सम्बन्धको बारेमा बताइन् । सम्बन्ध बाहिर नल्याउने तर, त्यसका लागि ३० लाख रुपैयाँ दिनुपर्ने उनीहरूको शर्त थियो 

व्यवसायीले आफूसँग त्यति रकम नभएको बताएपछि सुष्मा काठमाडौं फर्किइन् । ताज र दर्शनलाई भेटिन् । व्यवसायीलाई पुनः फोन गरेर ‘भैँसेपाटी प्रभागमा तपाईंविरुद्ध बलात्कार मुद्दा दर्ता गर्ने भइयो’ भन्दै सुष्माले फोन घुमाइन् । शुरूमै बलात्कारको जाहेरी दिँदा मुद्दा कमजोर हुने देखिएपछि शान्ति सुरक्षा गरिपाऊँ भन्दै व्यवसायीविरुद्ध भैँसेपाटी प्रभागमा उजुरी दिएको देखिन्छ । त्यही बीचमा ताज भैँसेपाटी प्रभागकी तत्कालीन इन्सपेक्टर शाही र सहायक हवल्दार हमालसँग नजिकिएका थिए । 

व्यवसायीलाई भैँसेपाटी बोलाइयो । उनलाई पैसा नदिए बलात्कार मुद्दाको थप जाहेरी दिने भनेर धम्क्याइयो । लफडामा पर्नुभन्दा पैसा दिएर उम्कने योजनामा व्यवसायी पुगे । उनले दुईवटा चेक र रकम दिए । रकम भीमादेवीको खातामा जम्मा गरियो । आफूलाई फसाउने नियतले पैसा असुलेको भन्दै व्यवसायीले यस विषयमा प्रहरीको उपल्लो तहमै गुनासो गरे । अनि शुरू भयो ललितपुर परिसरबाट अनुसन्धान । 

जब अख्तियारका एसपी थापा जोडिए

सुनसरी प्रहरी प्रमुखको जिम्मेवारी सम्हालेका बेला एसपी कमल थापा र ताजबीच सम्बन्ध थियो ।

उनै एसपी थापामार्फत ताजले भैँसेपाटी प्रभागकी तत्कालीन इन्सपेक्टर शाहीसँग मिलेर व्यवसायीलाई फसाउने योजनाका साथ बार्गेनिङ गरेको प्रहरी अनुसन्धानबाट खुलेको छ । 

अख्तियार दुरुपयोग अनुसन्धान आयोगमा कार्यरत एसपी थापा (हाल मुख्यालय तानिएका) जिल्ला प्रहरी कार्यालय कञ्चनपुरको प्रमुख भएका बेला इन्सपेक्टर विनुकुमारी शाही पनि कञ्चनपुरमै कार्यरत थिइन् । सोही चिनजानमा एसपी थापाको सिफारिसमा उनीहरू भैँसेपाटी पुगेको प्रहरीको दाबी छ । तर, पक्राउ परेका चारैजानाले शाहीसँग चिनजान नभएको बताएका छन् । 

ललितपुर परिसरले डीएसपी नरहरि अधिकारीको नेतृत्वमा छानबिन समिति गठन गरेको थियो । समितिले एसपी कमल थापामाथि अनुसन्धान गर्न सुझाव दिएको छ । हनी ट्र्याप प्रकरणका मुख्य योजनाकार ताज र एसपी थापाबीच एकपटक फोनमा कुराकानी भएको समितिले प्रतिवेदनमा उल्लेख गरेको छ । बलात्कार मुद्दामा फसाइदिने भन्दै ३० लाख दिन सहमत गराएको र २० लाख रुपैयाँ बुझेको दिन एसपी थापा र ताज स्लामबीच भेटघाट भएको सीसीटीभी फूटेज समेत समितिले फेला पारेको छ । 

त्यतिमात्रै होइन, उनीहरूबीच त्रिभुवन अन्तर्राष्ट्रिय विमानस्थल अगाडिको एक रेस्टुरेन्टमा असोज ७ गते साँझ साढे ६ बजे भेट भएको फुटेज समेत समितिले प्राप्त गरेको थियो । 

निलम्बित शाहीको खोजी हुँदै

सुनसरीको घटना हो भन्ने थाहा हुँदाहुँदै कार्यक्षेत्र भन्दा बाहिरको घटनाको सम्बन्धमा जाहेरी लिएर व्यवसायीलाई हनीट्रयापमा पार्न मद्दत गरेको आरोप प्रहरी निरीक्षक विनु शाहीमाथि छ । उनले उपल्लोे तहमा घटनाको विषयमा जानकारी गराउनुको साटो उल्टै आरोपितलाई साथ दिएको पाइएको छ । अनुसन्धानका क्रममा रकम जम्मा गर्न लगाउनेदेखि मोबाइल समेत गायब बनाउने भूमिकामा शाहीको संलग्नता देखिएको प्रहरीले जनाएको छ । 

शाहीविरुद्ध पक्राउ पुर्जी जारी भइसकेको छ । ललितपुर परिसरले पनि डीएसपी नरहरि अधिकारीको नेतृत्वमा समिति गठन गरेको थियो । उक्त समितिले हनी ट्रयाप प्रकरणका मुख्य योजनाकार ताज स्लामको मोबाइल र १० लाख रुपैयाँको चेक इन्सपेक्टर शाहीले नै गायब पारेको निष्कर्ष निकालेको छ । त्यतिमात्रै नभएर १३ लाख र ७ लाख रुपैयाँ गरेर दुईपटकमा भीमाकुमारीको खातामा २० लाख रुपैयाँ रकम जम्मा भएको थियो ।

उक्त रकम जम्मा गर्न एभरेस्ट बैंकसम्म शाहीकै गाडी पुगेको अनुसन्धानमा संलग्न प्रहरी अधिकारीहरू बताउँछन् ।