तीन करोड ३० लाख रुपैयाँ गैरकानूनी आर्जन गरेको भन्दै नापतौल विभागका निरीक्षकलाई ६ महिना कैद

२४ असार, काठमाडौं

गुणस्तर तथा नापतौल कार्यालय वीरगञ्जका वरिष्ठ निरीक्षक शशीभुषण कुमार यादव भ्रष्टाचार मुद्दामा दोषी ठहर भएका छन् ।

आइतबार विशेष अदालतले उनलाई गैरकानूनी सम्पत्ति आर्जन गरी भ्रष्टाचार गरेको भन्दै सजाय सुनाएको हो । उनीमाथि १६ जेठ ०८० मा मुद्दा दायर भएको थियो । ०४६ जेठदेखि उनी सरकारी सेवामा प्रवेश गरेका हुन् । अख्तियार दुरुपयोग अनुसन्धान आयोगले ०७९ असारसम्मको उनको सम्पत्ति गणणा गरिएको थियो । 

अनुसन्धानका क्रममा उनको खर्च तथा लगानी ७ करोड २४ लाख ५६ हजार रुपैयाँ रहेको भेटिएको थियो भने वैध आय दुई करोड ७७ लाख रुपैयाँ मात्र हुनुपर्ने खुलेको थियो । जसपछि स्रोत नखुलेको ४ करोड ४७ लाख रुपैयाँलाई बिगो कायम गरिएको भए पनि उनको अवैध आय ३ करोड ३० लाख ५१ हजार रुपैयाँ रहेको विशेषको ठहर छ । 

गत वर्ष १६ जेठमा यादवका साथै उनको एकसगोलका चार जनामाथि मुद्दा चलाइएको थियो । यस मुद्दामा विशेषका अध्यक्ष टेकनारायण कुँवर तथा सदस्यहरु रामबहादुर थापा र मुरारीबाबु श्रेष्ठको इजलासले फैसला गरेको हो । तत्काल प्रचलनमा रहेको भ्रष्टाचार निवारण ऐन, २०१७ अनुसार यादवलाई ६ महिना कैद हुने सजाय सुनाइएको छ । उनलाई बिगो बमोजिम तीन करोड ३० लाख रुपैयाँभन्दा बढी जरिवाना हुने भएको छ भने बिगोबराबरको सम्पत्ति जफतसमेत हुने फैसलामा उल्लेख छ । 

सार्वजनिक पदमा रहँदा अवैध रुपमा आर्जन गरेको तथा त्यसबाट बढे बढाएको सम्पत्ति श्रीमती रिना रानी र छोराहरु विकास यादव, अविनास यादवको नाममा राखेको दाबीसहित मुद्दा दर्ता भएको थियो ।