छायानाथका प्रमुख प्रशासकीय अधिकृत सारुसमेत १० जनालाई सफाइ

मुगुको छायानाथ रारा नगरपालिकामा भ्रष्टाचार भएको मुद्दामा सबैलाई सफाइ दिने फैसला भएको छ । मंगलबार विशेष अदालतले यस मुद्दाका सबै प्रतिवादीहरुलाई सफाइ दिने फैसला गरेको हो । 

नगरपालिकाको वडा नं. ७ र ८ स्थित ताल्चा सल्लेरी सडक स्तरोन्नतिका क्रममा २८ लाख रुपैयाँभन्दा बढी अनियमितता भएको दाबीसहित मुद्दा दायर भएको थियो । गत १५ माघमा अख्तियार दुरुपयोग अनुसन्धान आयोगले निमित्त प्रमुख प्रशासकीय अधिकृत पिताम्बर सारु, इञ्जिनियर महेशसिंह कठायत र असिस्टेन्ट सबइञ्जिनियर हस्तबहादुर मल्ललाई प्रतिवादी बनाउँदै मुद्दा दायर गरेको थियो । 

यसैगरी सडक निर्माण उपभोक्ता समितिका अध्यक्ष उनबहादुर शाही, सचिव राधिका रावल र कोषाध्यक्ष बिजुली मल्लविरुद्ध मुद्दा चलाइएको थियो । निर्माण अनुगमन समितिका सदस्यहरु चक्रबहादुर सावत, सदस्य हजारकला कामी, वडा नं. ८ का अध्यक्ष कर्ण रावल र तत्कालीन सदस्य पशुपति शाहीलाई पनि प्रतिवादी बनाइ मुद्दा चलाइएकोमा सबैले सफाइ पाएका हुन् । 

ताल्चा सल्लेरी सडक स्तरोन्नति कार्यमा अनियमितता भएको भेटिएको थियो । मानिसबाट गराउनुपर्ने अर्डिनरी स्वायल, सफ्ट रक, मिडियम रक र हार्ड रक कटिङका काम मेसिनबाट गराइएको, खन्ने कार्यमा पनि मेसिन प्रयोग गरिएको भेटिएको थियो । 

लागत स्वीकृत गराउँदा मानिसबाट गराउने भनी गराइएकोमा मेसिन प्रयोग गरी २८ लाख ६२ हजार रुपैयाँ अनियमितता गरेको अभियोग उनीहरुमाथि थियो । यस मुद्दामा विशेषका अध्यक्ष टेकनारायण कुँवर तथा सदस्यहरु मुरारीबाबु श्रेष्ठ र रितेन्द्र थापाको इजलासबाट यस्तो फैसला आएको हो ।