सम्पत्ति शुद्धिकरणमा पाँच दोषी ठहर, १३ असारमा सजाय तोकिने

५ असार, काठमाडौं

लागूऔषध मुद्दाकासमेत प्रतिवादी रहेका पाँच जना सम्पत्ति शुद्धिकरणमा दोषी पाइएका छन् । यस मुद्दाका अन्य दुई प्रतिवादीलाई भने विशेष अदालतले सफाइ दिएको छ । 

सम्पत्ति शुद्धिकरण अनुसन्धान विभागले गत वर्ष २३ माघमा सात जनालाई प्रतिवादी बनाउँदै मुद्दा दायर गरेकोमा पाँच जनामाथि कसूर कायमको फैसला भएको छ भने १३ असारका लागि सजाय निर्धारण पेसी तोकिएको छ । विशेषका सदस्यहरु खुसीप्रसाद थारु, तेजनारायण सिंह राई र रामबहादुर थापाको इजलासले यस्तो फैसला गरेको हो । 

विशेषले दीपक राई, सन्दिप राई, केसाङ योल्मु, रामकुमार लोवा र मिलन लोवालाई दोषी ठहर गरेको छ । दीपक, सन्दिप, केसाङ र रामकुमारले मिलनको खातामा पैसा जम्मा गरेको भेटिएको थियो । खातावाला मिलनले उक्त रकम झिकी सम्पत्ति शुद्धिकरण गरेको अभियोग लगाइएकोमा पुष्टि हुने फैसला भएको हो । 

दीपक र मिलनलाई यस मुद्दामा मुख्य कसूरदार ठहर गरिएको छ भने अरु तीन जना मतियार ठहर भएका छन् । उनीहरुले लागूऔषध किनबेचबाट आर्जित सम्पत्ति शुद्धिकरण गरेको विभागको अनुसन्धानले देखाएको थियो । जसपछि पाँच करोड २७ लाख रुपैयाँभन्दा बढी बिगो कायम गर्दै मुद्दा दायर भएको थियो । यसै मुद्दाका प्रतिवादीहरु भीमकुमार लोवा र राजेश श्रेष्ठले भने सफाइ पाएका छन् ।