बलिउडका सुपर स्टार अल्लु अर्जुन र आमिर खानका फिल्म क्रिसमसकाे दिन हलहरूमा लाग्ने

वर्णन संवाददाता

असार ३, २०८१ सोमबार ०९:१५

बलिउडका दुई ठूला सुपर स्टार अल्लु अर्जुन र आमिर खान बक्स अफिसमा आमनेसामने हुने भएका छन्। यस वर्षको क्रिसमस रिलिजमा पुष्पा–२ र सितारे जमिन परको भिडन्त हुने चर्चा बलिउडमा छ ।

यसअघि पुष्पा–२ अगस्ट १५ मा रिलिज हुने भनिएको भएपनि विविध कारण फिल्मको प्रदर्शन सारिएको छ। अहिलेसम्म आधिकारिक रुपमा घोषणा नगरिएको भएपनि हिन्दुस्तान टाइम्सले पुष्पा–२ क्रिसमसमा रिलिज हुने उल्लेख गरेको छ। यस अघि वेलकम–३ पनि क्रिसमसमा रिलिज हुने भएको थियो तर वेलकम–३ को निर्माण टिमले सितारे जमिनलाई सोलो रिलिजको अवसर दिँदै क्रिसमसमा रिलिज नगर्ने बताएको थियो।

तर अब भने लाल सिंह चड्डापछि कम्ब्याक गर्न लागेका आमिरलाई पुष्पा–२ पनि साथमा रिलिज हुने चर्चा टाउको दुखाइको विषय बनेको छ। अल्लु अर्जुनको हिन्दी बेल्टमा राम्रो फ्यान बेस भएका कारण आमिरको फिल्मलाई ठूलो असर हुने विश्लेषण गरिएको छ।

यसअघि २०२१ को क्रिसमसमा रिलिज गरिएको पुष्पाले बक्स अफिसमा राम्रो कमाइ गरेका कारण पनि अहिले पुष्पा–२ पनि क्रिसमसमा रिलिज हुने दाबी गरिएको छ। पुष्पा–२ मा अल्लु अर्जुन, रश्मिका मण्डना, विजय सेतुपतिलगायतको अभिनय रहेको छ भने सितारे जमिन परमा आमिर खानका अलावा जिनेलिया देशमुख, दरशील सफारीलगायतको अभिनय छ।