हेटौंडाको महाशक्ति सोप उद्योगमा आगलागी

हेटौंडा–८ स्थित औद्योगिक क्षेत्रभित्र स्थापित उद्योगमध्ये २०२७ सालमा स्थापित पुरानो उद्योगमा आगलागी भएको छ ।

जिल्ला प्रहरी कार्यालय मकवानपुरको जानकारी अनु्सार सोमबार विहान करिब ७ बजे विद्युत आपूर्ति गडबडी हुँदा सर्ट भएर साबुन उत्पादक उद्योग महाशक्ति सोप उद्योगको कार्टुन गोदाममा आगलागी भएकोे हो ।

आगलागीबाट उद्योगको र्यापर, केमिकल र कार्टुन तथा अन्य सामग्री गरी करिब ५० लाख बराबर क्षति भएको प्रारम्भिक अनुमानमा उद्योगले जनाएको प्रहरीले बताएको छ ।

हेटौंडा उपमहानगरपालिकाको दमकल, सशस्त्र प्रहरी, नेपाल प्रहरी र स्थानीयको सहयोगमा करिब एक घण्टापछि आगो निभाउन सफल भएको र आगलागी समयमै नियन्त्रणमा लिइएकाले ठूलो क्षति हुनबाट जोगिएको प्रहरीले जनाएको छ ।