ट्रम्पको चुनाव जितेकोमा तालिबान सरकारले के भन्याे ?

 अफगानिस्तानको तालिबान सरकारले पनि अमेरिकामा डोनाल्ड ट्रम्पको चुनाव जितेकोमा प्रतिक्रिया दिएको छ ।

अफगानिस्तानको तालिबान सरकारको विदेश मन्त्रालयले सन्तुलित परराष्ट्र नीतिको आशा राख्दै आगामी अमेरिकी सरकारले दुई देशबिचको द्विपक्षीय सम्बन्धमा ठोस प्रगति सुनिश्चित गर्ने विश्वास व्यक्त गरेको छ ।

तालिबान सरकारको विदेश मन्त्रालयले भन्यो, ‘नयाँ अमेरिकी सरकारले अफगानिस्तानप्रति व्यवहारिक दृष्टिकोण अपनाउनेछ, जसले दुई देशबिचको सम्बन्धको नयाँ चरण सुरुवात गर्नेछ ।’ 

तालिवानको विदेश मन्त्रालयले विश्वभर चलिरहेको द्वन्द्व, विशेष गरी गाजा र लेबनानमा जारी तनाव अन्त्य गर्न ट्रम्पले महत्त्वपूर्ण भूमिका निर्वाह गर्ने आशा पनि व्यक्त गरेको छ ।

सन् २०१६ मा ट्रम्प पहिलो पटक राष्ट्रपति बनेपछि आफ्नो कार्यकालमा अफगानिस्तानबाट अमेरिकी सेना फिर्ता गर्ने घोषणा गरेका थिए ।