एलन मस्कले मतदाताहरूलाई १० लाख डलर दिने अभियान जारी राख्न सक्ने

अमेरिकी खर्बपति व्यापारी एलन मस्कले स्विङ्ग स्टेटमा मतदाताहरूलाई १० लाख डलर दिने अभियान जारी राख्न सक्ने भएका छन् । 

पेन्सिल्भेनियाका न्यायाधीश एन्जेलो फोगिलिट्टाले यस्तो फैसला गरेका हुन् । नोभेम्बर ५ मा हुन लागेको राष्ट्रपति निर्वाचनमा मस्कले पूर्व अमेरिकी राष्ट्रपति डोनाल्ड ट्रम्पलाई सघाउन अमेरिका पीसीए नामक राजनीतिक समूह  खोलेका छन् । यस अन्तर्गत मस्कले स्विङ्ग स्टेट भने प्रसिद्ध अमेरिकाका सात राज्यमा हरेक दिन एक जना मतदातालाई १० लाख डलर दिइरहेका छन् । यो अभियान मंगलबार अन्त्य हुँदैछ ।

यसअन्तर्गतका अन्तिम प्रापकको नाम पनि घोषित भइसकेको छ । समूहले यस अभियानबाट पैसा पाउने मतदाताको चयन लटरीबाट गरेको होइन । समूहले छानेको हो । अभियान गैरकानूनी भएको भन्दै यसको विरुद्धमा फिलाडेल्फियाका जिल्ला वकिल लरेनस क्रास्नरले अमेरिका पीसीएलाई मुद्दा हालेका थिए । न्यायाधीश फोग्लिट्टाले आफ्नो फैसलाको कारण दिएका छैनन् ।

१० लाख डलर लटरीबाट नछानेको वकिल क्रिस गबरले भनेका छन् । आज र भोलि १० लाख डलर पाउने पापक को हुनेछ भन्ने कुरा आफूहरूलाई ठ्याक्कै थाहा भएको गबरले भनेका छन् । अन्तिम प्रापक मिसिगन राज्यका मतदाता हुने पनि उनले अदालतमा भने । 

सोमबारका लागि समूहले एरिजोनाका जोशुहा नाम गरेका व्यक्तिलाई छानेका थिए । गएको महिना मस्कले यो अभियानको घोषणा गर्दा अमेरिकी संविधानको पहिलो र दोस्रो संशोधनको पक्षमा याचिकामा हस्ताक्षर गर्न दर्ता भएका मतदाताहरूको भीड लाग्ने ठानिएको थियो ।

त्यसको केही दिन पछि अमेरिकी रक्षा मन्त्रालयले यो समूहले निर्वाचनससम्बन्धी कानू मिचेको हुन सक्ने भन्दै चेतावनी दिएको थियो । अमेरिकी कानुनले दर्ता भएका मतदातालाई यसरी पैसा बाँड्न निषेध गरेको छ । क्रास्नरको कार्यालय यो अभियान रोक्न मुद्दा हालेको थियो । यस पटकको निर्वाचनमा मस्क खुलेर ट्रम्पको पक्षमा लागेका छन् ।