राष्ट्रिय झन्डामाथि भगवा झन्डा फहराएको आरोपमा दुईजना पक्राउ

बंगलादेशको चटगाउँमा प्रहरीले राष्ट्रिय झन्डाको अपमान गरेको आरोपमा दुई अल्पसंख्यक हिन्दु युवालाई पक्राउ गरेको छ । चटगाउँको न्यू मार्केटस्थित आजादी स्तम्भमा राष्ट्रिय झन्डामाथि भगवा झन्डा फहराएको आरोपमा उनीहरूविरुद्ध मुद्दा दर्ता गरिएको हो । यस मुद्दामा अन्य १७ जनालाई पनि अभियुक्त बनाइएको छ ।

गत अक्टोबर २५ मा सनातन जागरण मञ्चले आफ्ना आठबुँदे मागलाई लिएर चटगाउँको लालदिघी मैदानमा जुलुस निकालेको थियो । र्‍यालीका क्रममा नयाँ बजार चोकमा रहेको आजादी स्तम्भमा केही व्यक्तिले भगवा झन्डा फहराएका थिए । यस झन्डामा ‘आमी सनातनी’ लेखिएको थियो ।

घटनापछि मोहरा क्षेत्रका फिरोज खानले कोतवाली प्रहरी चौकीमा उजुरी दर्ता गरेका थिए । उक्त मुद्दामा प्रहरीले दुई अभियुक्त राजेश चौधरी र हृदय दासलाई अक्टोबर ३० मा पक्राउ गरेको थियो बंगलादेशमा राष्ट्रिय झन्डाभन्दा माथि कुनै पनि रंगको झन्डा फहराउनु नियमको उल्लंघन हो ।चटगाउँका इस्कान सचिव चिन्मय कृष्ण दास ब्रह्मचारी उर्फ ​​चन्दन कुमार धरलाई पनि यस मुद्दामा अभियुक्त बनाइएको छ ।

यसअघि ६ अगस्टमा बंगलादेशको खुल्ना जिल्लामा रहेको इस्कान मन्दिरलाई निशाना बनाइएको थियो । जसमा भगवान् जगन्नाथको मूर्ति जलाइएको थियो । यस हमलापछि चिन्मय दासले चटगाउँका अन्य तीन मन्दिर पनि खतरामा रहेको बताएका थिए । तर, हिन्दु समुदायले मन्दिरलाई जोगाउन मिलेर काम गरिरहेका छन् ।

बंगलादेश हिन्दु बौद्ध क्रिश्चियन एकता परिषद्का अनुसार, देशमा नयाँ सरकार गठन भएपछि अल्पसंख्यक समुदायका ४९ शिक्षकले राजीनामा दिएका छन् ।